LeBron James með 46 stig á aðeins 33 mínútum og jafnaði við MJ

Lakers-liðið tapaði 133-115 á móti nágrönnum sínum í Los Angeles Clippers. James skoraði 46 stig á aðeins 33 mínútum og var að auki með 8 fráköst og 7 stoðsendingar.

Með þessu varð James sá fyrsti til að ná fjörutíu stiga leik á móti öllum þrjátíu liðunum í NBA-deildinni.

Hann nýtti 16 af 29 skotum sínum og setti niður 9 af 14 þristum og hitti úr öllum fimm vítunum. Þetta er nýtt persónulegt met hjá honum í þriggja stiga körfum í einum og sama leiknum.  Hann er líka sá fyrsti eldri en 35 ára sem nær níu þristum í einum leik.

LeBron James jafnaði líka afrek Michaels Jordan með því að ná sínum þriðja 45 stiga leik eftir 38 ára afmælið.

James nálgast líka óðum stigamet Kareem Abdul-Jabbar sem skoraði á sínum tíma 38.387 stig íu 1560 leikjum.

James vantar nú bara 177 stig til að ná Abdul-Jabbar en LeBron er kominn með 38.210 stig í 1404 leikjum.