KKÍ með í baráttunni gegn endurkomu Rússa og Hvít-Rússa á svið íþróttanna

Óskar Ófeigur Jónsson skrifar 16. janúar 2023 13:54

Frá leik Íslands og Georgíu í Laugardalshöll í undankeppni HM. Vísir/Vilhelm

Körfuknattleikssamband Íslands er meðal körfuboltasambanda Norðurlandanna og Eystrasaltsríkjanna sem sendu í dag frá sér yfirlýsingu vegna stríðsins í Úkraínu.

KKÍ tekur þar virkan þátt í baráttunni gegn því að Rússar og Hvít-Rússar fái að snúa aftur inn á vettvang íþróttanna.

Hannes S. Jónsson, formaður KKÍ, er nýkominn heim frá Eistlandi þar sem körfuknattleiksambönd Norðurlandanna funduðu og unnu að eftirfarandi yfirlýsingu.

„Fulltrúar árásarríkja eiga engin tækifæri að fá til þátttöku í íþróttum, körfuknattleik þar á meðal, hvorki sem iðkendur né starfsmenn. Almenningur á með engu móti að líða stríðsátökin sem árásarþjóðin á upptök að,“ segir meðal annars í yfirlýsingunni.

Yfirlýsing frá körfuknattleikssamböndum Norðurlandanna og Eystrasaltsríkjanna

Körfuknattleikssambönd Norðurlandanna og Eystrasaltsríkjanna vekja athygli ykkar og almennings á þeirri staðreynd að með öllu er ótímabært að íhuga endurkomu Rússa og Hvít-Rússa að vettvangi íþróttanna.

Árásir Rússa í Úkraínu standa enn yfir og færast í aukana. Við þær kringumstæður verður ekki unað við það að Rússar og Hvít-Rússar fái að snúa aftur á svið alþjóðlegra íþrótta.

Fulltrúar árásarríkja eiga engin tækifæri að fá til þátttöku í íþróttum, körfuknattleik þar á meðal, hvorki sem iðkendur né starfsmenn. Almenningur á með engu móti að líða stríðsátökin sem árásarþjóðin á upptök að.

Skoðun okkar er sú að Rússar og Hvít-Rússar eigi ekki að fá leyfi til að taka þátt í alþjóðlegum körfuknattleik eða öðrum íþróttum, hvorki sem keppendur né starfsmenn, og útiloka beri þá frá stjórnum og sem embættismenn alþjóðlegra íþróttasambanda þar til árásum Rússa linnir og friður kemst á.

Körfuknattleikssamband Danmerkur, Mads Young Christensen formaður

Körfuknattleikssamband Eistlands, Priit Sarapuu formaður

Körfuknattleikssamband Finnlands, Timo Elo formaður

Körfuknattleikssamband Íslands, Hannes S. Jónsson formaður

Körfuknattleikssamband Lettlands, Raimonds Vejonis formaður

Körfuknattleikssamband Litháens, Vydas Gedvilas formaður

Körfuknattleikssamband Noregs, Jan Hendrik Parmann formaður

Körfuknattleikssamband Póllands, Radoslaw Piesiewicz formaður

Körfuknattleikssamband Svíþjóðar, Susanne Jidesten formaður

Körfubolti HM 2023 í körfubolta