Fólk ekki öruggt í ís­lensku sam­fé­lagi nema það sé vel fjáð

Bjarni Benediktsson, fjármálaráðherra, og Willum Þór Þórsson heilbrigðisráðherra höfnuðu því báðir að loknum ríkisstjórnarfundi á föstudag að starfsemi Landspítalans sé vanfjármögnuð. Bæði starfsmenn og stjórnendur spítalans hafa kallað eftir auknu fjármagni.

Þá hafa ummæli Björns Zoëga, stjórnarformanns spítalans, um að fjármagn sé ekki vandamál spítalans, verið umdeild.

„Það er ekki hlutverk stjórnarmanns, eða formanns stjornar landspítalans, raunverulega að tjá sig á þennan hátt. Hann er að grípa framí fyrir Runólfi Pálssyni forstjóra spítalans og það er óskynsamlegt,“ sagði Kári Stefánsson, forstjóri Íslenskrar erfðagreiningar í Sprengisandi á Bylgjunni í morgun.

Landspítalinn ekki nógu vel fjármagnaður

Hann er sannfærður um að Björn hafi orðað ummæli sín illa og telji spítalann ekki nógu vel fjármagnaðan í raun.

„Ég held að Björn sé ekki á þeirri skoðun að spítalinn sé fyllilega fjármagnaður, vegna þess að hann er það ekki.“

Hann sé hins vegar sammála því að margt annað þurfi að bæta innan veggja spítalans. Eins og staðan sé núna sé velferðarkerfið eins og það hefur verið ekki til staðar.

„Það er að minnsta kosti alveg ljóst að velferðarkerfið okkar, sem er þessi gimsteinnn sem gerir þetta samfélag, eða hefur gert það að griðarstað í gegnum áratugina, er farið að gefa eftir. Það er orðið mjög erfitt að telja sjálfum sér trú um að fólk sé öruggt í íslensku samfélagi nema það sé tiltölulega vel fjáð,“ segir Kári.

Ekki eigi að taka tillögum Björns gagnrýnislaust

Verið er að breyta fjármögnun spítalans á þann hátt að greitt veðrur fyrir unnin verk og hefur forstjóri spítalans lýst yfir von um að slík fjármögnun verði til bóta á árinu. Kári segist ósammála þeirri nálgun. 

„Ég held því fram að ef maður horfir á sjónarmið velferðarkerfisins þá eigi að fjármagna spítalann eftir þörfum hans ekki eftir afköstum. Ég held því fram að það sé skrítið að fara að fjármagna spítalann eftir því hvað hann gerir margar mjaðmaskiptiaðgerðir á ári vegna þess að þá er spítalinn kominn með hvata til að skipta um mjaðmaliði á öllum Íslendingum,“ segir Kári.

Þó svo að Birni hafi tekist vel til sem forstjóri Karolinska sjúkrahússins í Svíþjóð þýði það ekki að taka eigi tillögum hans gagnrýnislaust. 

„Og enn sem komið er hef ég enn ekki heyrt hann koma fram með tillögu sem myndi fela í sér galdralausn á okkar vandamáli. Björn Zoëga var góður forstjóri Landspítalans og ég er viss um að hann er góður forstjóri Karolinska, en þetta er bara mjög flókið verkefni að halda utan um sjúkrahús eins og Landspítalans. Það er ekki gott ef þessir tveir aðilar, stjórnarformaður og forstjóri, tala ekki í sama takti. Og það að halda því fram að spítalinn sé ekki vanfjármagnaður er bara rugl.“