Vill Mourinho sem næsta Bond skúrk

Mendes er á meðal fremstu leikstjóra heims en kvikmyndir hans hafa sankað að sér 33 tilnefningum til Óskarsverðlauna. Hann hlaut slík verðlaun sem besti leikstjóri fyrir vinnu við hans fyrstu kvikmynd, American Beauty, árið 1999.

Mendes leikstýrði þá Bond-myndunum Skyfall og Spectre sem komu út árin 2012 og 2015 en í veglegu viðtali við The Guardian var hann spurður hver ætti að vera næsti skúrkurinn sem James Bond tekst á við. Hann lá ekki á svari.

„Hvað varðar næsta Bond-skúrk? José Mourinho. Þú færð ekki mikið betri skúrk en það, er það nokkuð?“

Mourinho er í dag knattspyrnustjóri Roma en hefur verið á meðal þeirra sigursælustu í heimi á þessari öld, með Porto, Chelsea, Inter, Real Madrid og Manchester United.