Marta sakar full­trúa meiri­hlutans um ein­ræðis­til­burði

Þetta kemur fram í fundargerð forsætisnefndar þar sem til umræðu var dagskrá komandi borgarstjórnarfundar. Forsætisnefnd borgarstjórnar fundaði á föstudag.

Marta telur nauðsynlegt að fara í saumana á málefnum Ljósleiðarans; umræðu sem varði grundvallarsjónarmið um rekstur fyrirtækja í eigu almennings, milljarða lántökur og viðskiptasamninga sem þarfnast miklu nánari skoðunar. 

Fulltrúar meirihlutans töldu hins vegar að tímasetning slíkrar umræðu þurfi að vera „hentug“ og nefndu að stundum geti málum verið þannig háttað að „ekki [verði] hjá því komist að fresta umræðunni eða jafnvel taka ákvörðun um að umræða fari fram fyrir luktum dyrum.

Marta lagði á fundi forsætisnefndar fram tillögu um að taka á dagskrá umræðu um málefni Ljósleiðarans. Tillögunni var hins vegar hafnað með þremur atkvæðum fulltrúa Samfylkingar, Framsóknar og Viðreisnar – Sabine Leskopf, Einars Þorsteinssonar og Geirs Finnssonar. Fulltrúi Vinstri grænna í nefndinni, Líf Magnedóttir, sat hjá.

Mikilvægt að tímasetning sé hentug

Þau Sabine, Einar og Geir sögðu að ákaflega mikilvægt væri að borgarstjórn ræði málefni fyrirtækja í eigu borgarinnar eftir því sem aðstæður krefjast hverju sinni. Þó sé mikilvægt að slíkri umræðu sé valin hentug tímasetning, sem meðal annars geti ráðist af sérstökum aðstæðum hjá viðkomandi fyrirtæki eða viðkvæmri stöðu þeirra tilteknu mála sem eftir atvikum standi til að ræða og varða fyrirtækið.

„Borgarfulltrúar eiga vissulega rétt á að tekið verði á dagskrá borgarstjórnar hvert það málefni sem sérstaklega varðar hagsmuni sveitarfélagsins eða verkefni þess en mikilvægt er að hafa í huga að það er borgarstjórn sjálf með aðkomu forsætisnefndar sem hefur um það endanlegt vald hvaða mál verða tekin á dagskrá fundar.

Þrátt fyrir að það geti verið um að ræða mál sem á undir verksvið borgarstjórnar, þ.e. varðar hagsmuni sveitarfélagsins eða verkefni þess, getur málum verið þannig háttað að ekki verður hjá því komist að fresta umræðunni eða jafnvel taka ákvörðun um að umræða fari fram fyrir luktum dyrum. Telur meirihluti forsætisnefndar því rétt að málefni Ljósleiðarans verði rædd við fyrsta tækifæri um leið og hægt er og aðstæður bjóða,“ segir í bókun fulltrúa meirihlutans.

„Einræðistilburðir“ fulltrúa meirihlutans

Marta var síður en svo ánægð með þessi svör fulltrúa meirihlutans og segir að með því að hafna því enn og aftur að setja málefni fyrirtækja í eigu Reykjavíkurborgar á dagskrá borgarstjórnar hafi leyndarhyggja fulltrúa meirihlutans náð nýjum hæðum.

„Fyrir slíkum einræðistilburðum eru engin fordæmi í sögu Reykjavíkur. Málefni Orkuveitu Reykjavíkur og dótturfyrirtækja hafa oft og iðulega verið á dagskrá borgarstjórnar og sú umræða hefur verið gagnleg og stundum nauðsynleg. Við það verður ekki unað að fulltrúar flokka sem mynda meirihluta í borgarstjórn geti í skjóli síns bandalags komið í veg fyrir að borgarfulltrúar utan meirihlutans geti sinnt sínu lögboðna starfi. Það samræmist augljóslega ekki sveitarstjórnarlögum og samþykktum borgarinnar,“ segir Marta í sinni bókun.

Segir hún ennfremur að borgarfulltrúar Viðreisnar, Samfylkingar, Framsóknarflokks og Pírata vilji koma sér undan umræðu sem verði grundvallarsjónarmið um rekstur fyrirtækja í eigu almennings, milljarða lántökur og viðskiptasamninga sem þarfnast miklu nánari skoðunar. „Afstaðan sem hér kemur fram undirstrikar mikilvægi þess að upplýst verði allt sem snýr að þessum samningum,“ segir Marta.