Frávita vegna andláts náins vinar: „Gífurlegt tóm innra með mér“

Serbarnir tveir voru samherjar hjá bæði Lazio og Inter á leikmannaferli sínum auk þess að spila saman með landsliði Serba.

Mihajlovic tapaði baráttunni við hvítblæði 16. desember síðastliðinn og lést 53 ára að aldri. Hann hafði glímt við sjúkdóminn í þrjú ár.

Stankovic var á meðal kistubera í jarðarför félaga síns.

„Ég er orðlaus eftir andlát Sinisa,“ segir Stankovic við ítalska fjölmiðla. „Ég finn gífurlegt tóm innra með mér sem ég hef ekki fundið áður. Ég er enn ungur og bý lukkulega enn að öllum mínum nánustu“.

„Mér líður hins vegar eins og allt sem ég á hafi farið með honum. Ég stend eftir með minningur og gríðarmikið stolt af því að hafa verið hluti af lífi hans. Við sáum öll hvernig manneskja Sinisa Mihajlovic var,“ segir Stankovic enn fremur.

Stankovic tók við Sampdoria í byrjun október en liðið hafði verið í töluverðum vandræðum í ítölsku A-deildinni. Erfiðlega hefur gengið að snúa því við en Sampa hefur aðeins unnið einn leik af níu undir hans stjórn.

Fyrir það var Stankovic stjóri Rauðu stjörnunnar í Serbíu sem hann stýrði til þriggja serbneskra meistaratitla á jafnmörgum árum. Hinn íslensk-serbneski Milos Milojevic var aðstoðarmaður Stankovic í tvö af þeim árum og tók svo við Rauðu stjörnunni í sumar.