Fögnuðu ofan á mótherja sínum

Sigurkarfa Chicago Bulls á móti Atlanta Hawks vakti athygli og þá ekki síst fyrir örlög eins leikmanns tapliðsins sem fékk að finna fyrir því að hafa sofnað á verðinum í baráttunni um lokafrákastið.

Chicago Bulls liðið átti síðustu sókn leiksins þegar staðan var jöfn, 108-108. DeMar DeRozan tók það sem átti að vera lokaskotið en hann klikkaði á því.

Atlanta Hawks leikmaðurinn John Collins var settur inn á völlinn fyrir síðustu vörnina og var í lykilstöðu til að taka frákastið. Hann missti hins vegar af því á einhvern óskiljanlegan hátt.

Ayo Dosunmu náði sóknarfrákastinu og tryggði Bulls liðinu 110-108 sigur um leið og klukkan rann út.

Það var það sem gerðist eftir körfuna sem vakti einna mesta athygli.

Ayo Dosunmu féll nefnilega ofan á John Collins eftir körfuna og svo fór að leikmenn Chicago Bulls hrúguðust allir ofan á þá báða til að fagna sigurkörfunni.

Leikmenn Chicago fögnuðu því ofan á mótherja sínum eins og sjá má hér fyrir neðan.