Míkró­fónninn eftir­minni­legasta jóla­gjöfin: „Ég ætlaði alltaf að verða söng- og leik­kona“

Jólamolar Vísis munu birtast reglulega fram að jólum. Þar fáum við að kynnast þjóðþekktum einstaklingum í nýju ljósi og komast að því hvað það er sem kemur þeim í jólagírinn. Jólamolunum er ekki síður ætlað að koma lesendum Vísis í hið eina sanna hátíðarskap.

Hvort myndirðu skilgreina þig sem Elf eða The Grinch?

„Ég er mun líkari Elf heldur en nokkurn tímann The Grinch. Ég elska jólin, elska að gefa jólagjafir og elska að vera með fólkinu mínu. Svo er einhver kósý og þægileg tilfinning sem kemur yfir mig á þessum tíma sem mér þykir mjög vænt um.“

Hver er þín uppáhalds jólaminning?

„Ætli það séu ekki fyrstu jólin okkar Gumma með krökkunum hans. Svo er mín allra uppáhalds jólaminning þegar amma og afi buðu okkur mömmu og bróður mínum alltaf í mat á annan í jólum. Við náðum svo miklum gæðastundum saman og ég held fast í þessar minningar þar sem þau eru bæði fallin frá.“

Hver er eftirminnilegasta jólagjöf sem þú hefur fengið?

„Ég mun aldrei gleyma þegar ég fékk míkrófón og míkrófónastand sem krakki. En þessi gjöf sló öll met þar sem ég ætlaði alltaf að verða söng- og leikkona þegar ég yrði eldri. Mikið svakalega var þessi míkrófónn ofnotaður greyið.“

Hver er versta jólagjöf sem þú hefur fengið?

„Þetta hljómar örugglega skelfilega en það voru alvöru vonbrigði þegar ég fékk konfektkassa þegar ég bjóst við náttfötum.“

Hver er uppáhalds jólahefðin þín?

„Ég er ekki með margar hefðir en það er ein hefð sem er hjá okkur vinkonuhópnum og það eru litlu jólin. Við hittumst á hverju ári og höldum litlu jól sem er líklega hefð sem er komin til að vera.“

Hvert er þitt uppáhalds jólalag?

„Mitt allra uppáhalds jólalag er Ein handa þér með Stefáni Hilmarssyni. Það er eitthvað sem kemur yfir mig þegar ég heyri þetta lag.“

Hver er þín uppáhalds jólamynd?

„Það eru nokkrar sem ég held upp á en ætli ég segi ekki The Holiday.“

Hvað borðar þú á aðfangadag?

„Þar sem ég er grænmetisæta þá er það vegan steik sem mér þykir ótrúlega góð. Svo gerir Gummi eina bestu sósu sem ég hef smakkað sem kemur frá ömmu hans.“

Hvers óskar þú þér í jólagjöf í ár?

„Ég hef ekki hugmynd um hvað mig langar í þar sem mig vantar nákvæmlega ekkert. En ætli gjafabréf í flug væri ekki bara málið þar sem ég elska að ferðast!“

Hvað er það sem hringir inn jólin fyrir þér?

„Þegar klukkan slær 18 og kirkjuklukkurnar byrja að hringja inn jólin.“

Er eitthvað skemmtilegt á döfinni hjá þér núna fyrir jólin?

„Að skila BS ritgerðinni minni og fagna því að vera búin með skólann. Svo er það aðallega vinnan mín sem tengist vörumerkinu mínu Define The Line þar sem það er alltaf nóg að gera í desember og svo tekur janúar sprengjan við þar sem allir fara á fullt að hreyfa sig og vilja splæsa í ný æfingaföt.“