Meiddur Paul Pogba dansar um stofuna sína og vildi sýna heiminum það

Fyrir tveimur vikum varð það gefið út að Pogba yrði ekki með franska landsliðinu í titilvörninni á HM í Katar. Hann var því ekki í hópnum sem var tilkynntur í gær.

Pogba var í lykilhlutverki þegar Frakkar urðu heimsmeistarar 2018 en hann hefur oft spilað mun betur með franska landsliðinu en félagsliðum sínum. Frakkar ættu því að sakna hans þótt að fá landslið séu með meiri breidd en þeir.

Meiðsli hafa auðvitað sett mikinn svip á feril Pogba síðustu ár og hann missti sem dæmi af mjög mörgum leikjum með Manchester United á síðustu leiktíð.

Samningur Paul Pogba við United rann út í sumar og hann gerði í framhaldinu fjögurra ára samning við Juventus.

Það byrjaði hins vegar afar illa því Pogba meiddist á liðþófa á undirbúningstímabilinu í lok júlí. Hann fór ekki í aðgerð þá en þurfti seinna að leggjast á skurðarborðið. Nú erum við komin inn í nóvember, næstum því fjórumr mánuðum eftir að hann meiddist, en Juve hefur ekki getað notað hann í eina sekúndu.

Pogba virðist þó vera klár í slaginn ef marka má samfélagsmiðla hans.

Enginn veit svo sem hvaða skilaboð Pogba var að senda með því að birta myndband af sér dansandi um stofuna en myndbandið má sjá hér fyrir ofan.

Það er ekki að sjá að þarna sé meiddur maður á ferðinni en hann skrifaði undir: „Fjölskyldutími. Hnéð stóðst prófið.“