Opna fyrsta fót­bolta­skemmti­garð landsins í Smára­lind

Skemmtigarðurinn verður staðsettur í Vetrargarðinum í Smáralind. Þar verður hægt að finna fjölda stafrænna tækja og þrautum tengdum fótbolta. Með stofnun garðsins vilja eigendur uppfylla þarfir fótboltaáhugafólks og mæta vaxandi eftirspurn eftir fjörugri afþreyingu með hreyfingu sem hentar öllum aldurshópum. Brautirnar tuttugu skiptast í tvær tegundir, keppnisbrautir og skemmtibrautir. 

„Í keppnisbrautunum munu gestir keppast um að fá sem flest stig úr hverri braut og sigra þannig vini eða fjölskyldu í viðkomandi brautum. Í skemmtibrautunum snýst allt um að hafa gaman þó svo að alltaf sé hægt að stilla upp keppni í þeim brautum líka kjósi gestir svo. Í skemmtibrautunum geta fleiri en einn spilað í einu,“ segir í tilkynningu frá Senu sem rekur meðal annars Smárabíó og sér um skemmtigarðinn í Smáralind.

Notast verður við margar af heimsins helstu tækninýjungum í garðinn, til dæmis RFID-armbönd sem halda utan um stig keppanda og stafræn fótboltatæki sem notuð eru á æfingasvæðum stærstu fótboltaklúbba heims.