Frá þessu er greint á vef Kringvarpsins í morgun, en brottreksturinn er þó háður heimild í lögum sem kveður á um að heimilt sé að leysa ráðherra frá embætti sé það samþykkt af meirihluta þingmanna.
Bárður segir að frá því að hann tók við embætti lögmanns hafi hann reynt að vera diplómatískur og umburðarlyndur í sínum störfum. Jenis av Rana, sem er þingmaður færeyska Miðflokksins, hafi hins vegar í sumum tilvikum talað gegn stefnu Nielsen og gert honum erfitt fyrir í störfum sínum.
Í yfirlýsingu sinni segir Bárður að eftir að Jenis hafi í gær beinlínis hvatt aðra ráðherra til að ganga gegn orðum lögmannsins sé umburðarlyndið einfaldlega á þrotum.
Þrátt fyrir að vilja Jenis úr ríkisstjórninni segir Bárður Miðflokkinn enn hluta af ríkisstjórnarsamstarfinu, sem samanstendur einnig af Sambandsflokknum og Fólkaflokknum. Málið snúist eingöngu um framkomu ráðherrans.
Áður en tilkynning Bárðar barst hafði Høgni Hoydal, formaður stjórnarandstöðuflokksins Tjóðveldis, boðað vantrauststillögu á hendur ráðherranum.
