Stór­lið PSG í vand­ræðum með Troyes

Mame Balde kom Troyes óvænt yfir strax á þriðju mínútu leiksins en Carlos Soler jafnaði metin um miðbik fyrri hálfleiksins eftir sendingu Neymar. Staðan 1-1 þegar flautað var til loka fyrri hálfleiks.

Balde kom gestunum aftur yfir í upphafi síðari hálfleiks en Lionel Messi jafnaði metin skömmu síðar eftir sendingu frá góðvini sínum Sergio Ramos. Neymar kom PSG svo yfir áður en Kylian Mbappé tvöfaldaði forystuna með marki úr vítaspyrnu þegar stundarfjórðungur var eftir af leiknum.

Gestirnir neituðu að gefast upp og Ante Palaversa minnkaði muninn undir lok leiks en nær komust þeir ekki og PSG vann leikinn 4-3.

PSG er á toppi deildarinnar með 32 stig eftir sigur dagsins. Lens er í öðru sæti með 30 stig en hafa þó leikið einum leik meira en toppliðið.