Áhersla á sjálfbærni í nýrri leigu og fagverslun BYKO

„Sérstaða BYKO Leigu er blandað úrval leigu- og söluvöru,“ segir Eggert Kristinsson, framkvæmdastjóri fyrirtækjasviðs BYKO. „En einnig bjóðum við viðskiptavinum okkar upp á faglega ráðgjöf á sama tíma. Það er hægt að fara yfir málin með sérfræðingum BYKO og meta það hvort leiga eða kaup sé hagkvæmasta lausnin.“

Stærsti viðskiptavinur BYKO Leigu eru verktakafyrirtæki á markaði, en einnig bæjarfélög og stofnanir. „Rökin fyrir því að leigja frekar en að kaupa eru alltaf að verða sterkari,“ segir Bragi Jónsson, rekstrarstjóri BYKO Leigu. „Það er ekki síst að þakka aukinni umræðu um umhverfismál og sjálfbærni. Fólk leggur meiri áherslu á góða nýtingu, lítið kolefnisspor og deilihagkerfið. Það er að mörgu leyti umhverfisvænna að leigja en kaupa.“

Þrátt fyrir aukna áherslu á leigu, vilja sumir frekar eiga eigin tæki. Í fagverslun BYKO Leigu á Selhellu er lögð sérstök áhersla á þýska gæðamerkið Bosch og má kynna sér vörulínu þeirra í rafmagnsverkfærum í nýjum og glæsilegum sýningarsal. Einnig eru tæki frá Honda lykilvörur í versluninni á Selhellu og segir Eggert að þau hafi sannað gæði sín og endingu í áranna rás. Bætir hann við að mikið sé lagt upp úr persónulegri þjónustu og ráðgjöf enda býr starfsfólk BYKO yfir áratuga langri reynslu af öllu sem viðkemur verkfærum og framkvæmdum.

Þessum tímamótum var fagnað með veislu í Selhellu á dögunum og þar var mjög glatt á hjalla eins og sjá má á meðfylgjandi myndum.