Netverjar hneykslast yfir háu verðlagi í „Gróða hirðinum“

Athygli var vakin á verðhækkunum í Góða hirðinum innan Facebook hópanna Áhugahópur um endurvinnslu og endurnýtingu og Vertu á verði - eftirlit með verðlagi í dag.

Þar lýsti einn viðskipavinur því að það hafi reynst ódýrara að versla hluti annars staðar heldur í Góða hirðinum, þrátt fyrir að Góði hirðirinn hefði áður verið „verslun fyrir fólk sem hafði ekki mikið og gat farið og keypt sér ódýrt dót í heimili á einum stað.“

„Það er orðið dýrara að versla notað þarna en nýtt í Rúmfó og Ikea. Sem þýðir að rosalega mikið magn fer í urðun í staðinn. Ef engin er hreyfingin. Sem kemur út á það sama. Þessi staður er búinn að missa marks. Finnst kominn tími til að breyta nafninu ì Okur Hirðirinn,“ segir Bránn Jónsson í færslu sinni.

Fjölmargir taka undir og eru á annað hundrað ummæli við færsluna þegar þetta er skrifað auk þess sem fjörutíu hafa deilt færslunni í hópnum Áhugahópur um endurvinnslu og endurnýtingu. Í hópnum Vertu á verði er færslan með ríflega hundrað ummæli og á áttunda tug deilinga. 

„Ég var dugleg að versla þarna en er nánast hætt því núna vegna fáránlegra verðmiða! Það er ekki eins og þeir séu að kaupa inn vörurnar eða panta þær að utan og borga mikla tolla þetta er bara græðgi!“ skrifar ein.

„Rétt, því miður. Reyni að selja allt beint á netinu frekar en að gefa í GH. Hélt að Góði Hirðirinn ætti að vera fyrir fólkið en það hefur eitthvað snúist við,“ segir annar.

„Verð nú bara að taka undir þetta. Góði hirðirinn er alveg fáránlega dýr. Margt þarna er dýrara en að kaupa bara nýtt. Dettur ekki í hug að finna neitt orðið þarna,“ segir sá þriðji. „Sammála það er all nokkuð síðan þessi verslun breyttist í Gróða hirðirinn,“ segir enn annar. 

Rúmfatalagerinn tók þá þátt í umræðunni á dögunum, þegar bent var á verðlagningu á sturtuhillu. 

Neyddust til að bregðast við svartri stöðu í sumar

Aðrir hafa komið Góða hirðinum til varnar og bent til að mynda á að hluti ágóðans fari í hið minnsta til góðgerðarmála. 

Samkvæmt upplýsingum sem fréttastofa fékk frá starfsmanni Góða hirðisins voru verð lengi óbreytt og tók það þau langan tíma að hækka verð á ákveðnum hlutum.

Verðbólgan hafi einnig bitið þau líkt og alla aðra í samfélaginu. Höfðu þau vonað að svo yrði ekki en í sumar hafi orðið ljóst að staðan væri orðin svört og að innan tveggja ára hafi litið út fyrir að Góði hirðirinn yrði ekki til ef ekki yrði brugðist við. 

Verslunin hafi komið illa út úr Covid tímabilinu, fyrsta árið vegna fjöldatakmarkanna og seinna árið vegna mikilla veikinda starfsmanna.

Þá sé kostnaður falinn í því að fá hlutina keyrða til þeirra, meðal annars frá endurvinnslustöðvum, en ekkert kemur beint inn til þeirra og þar af leiðandi þurfi að greiða fyrir mikinn akstur. Laun séu sömuleiðis að hækka en um þrjátíu manns vinni í kringum Góða hirðirinn.

Hækkun bóka um fimmtíu krónur, í 250 krónur, og geisladiska um hundrað krónur, í 200 krónur, hafi vakið hvað mest viðbrögð. Einnig hefur verið kvartað yfir verði í versluninni á Hverfisgötu og í netverslun.

Þau hafi þó farið eins hóflega í verðhækkanir og hægt var og fólk verði nú að meta sjálft hvort það telji það þess virði eða ekki að versla við þau, með það þó í huga að allt hafi hækkað.