Fyrr­verandi þing­maður sér eftir sínum hlut í Lands­dóms­málinu

Þingmannanefnd til að fjalla um skýrslu rannsóknarnefndar Alþingis var níu manna þingmannanefnd skipuð miðað við þingstyrk flokka á löggjafarþinginu sem kosið var í kjölfar þess að ríkisstjórn Sjálfstæðisflokks og Samfylkingar var felld árið 2009.

Niðurstöður Rannsóknarskýrslunnar voru meðal annars þær að ráðherrarnir fyrrverandi Árni M. Mathiesen fjármálaráðherra, Geir H. Haarde forsætisráðherra og Björgvin G. Sigurðsson hefðu sýnt af sér vanrækslu í starfi með vítaverðu gáleysi.

Þingmannanefndin tók afstöðu til þess hvort samþykkja ætti þingsályktunartillögu um að ráðherrarnir þrír, auk Ingibjörgar Sólrúnu Gísladóttur, fyrrverandi utanríkisráðherra, yrðu ákærðir fyrir Landsdómi. 

Vildi ákæra alla nema Björgvin

Nefndarmenn Vinstri grænna, Framsóknarflokks og Hreyfingarinnar vildu að allir ráðherrarnir yrðu ákærðir, nefndarmenn Sjálfstæðisflokksins vildu ekki að neinn yrði ákærður. Nefndarmenn Samfylkingarinnar, þar á meðal Magnús Orri Marínarson Schram, vildu að allir utan Björgvins G. Sigurðssonar yrðu ákærðir. Magnús Orri mælti fyrir þingsályktunartillögu um að ráðherrarnir yrðu ákærðir.

Þessu sér Magnús Orri nú eftir. „Ég vil biðjast afsökunar á mínum hlut í Landsdómsmálinu,“ svo hefst færsla sem Magnús Orri birti á Facebook í kvöld.

„Fyrir tólf árum ákvað meirihluti Alþingis að vísa máli Geirs H. Haarde til landsdóms. Á þeim tíma sat ég á Alþingi og í nefnd þingmanna sem fjallaði um Rannsóknarskýrsluna og hvernig ætti að taka á lögum um ráðherraábyrgð. Mín afstaða var þá að rétt væri að vísa málum Geirs H. Haarde, Ingibjargar Sólrúnar Gísladóttur og Árna M. Mathiesen til Landsdóms. Þeirri ákvörðun sé ég eftir,“ segir hann.

Hann segist í dag vildi óska sér að hann hefði haft hugrekki til að tala fyrir því að umfjöllun um ábyrgð ráðherra hefði lokið á vettvangi nefndarinnar. 

Þingsályktunartillögur nefndarinnar voru lagðar fyrir þingið og fór það svo að ályktun um ákæru á hendur Geir H. Haarde var samþykkt með 33 atkvæðum gegn 30. Ályktanir um ákærur á hendur hinum ráðherrunum þremur voru felldar af þinginu. Geir var fyrir Landsdómi sakfelldur fyrir einn ákærulið af fjórum fyrir brot gegn 17. grein Stjórnarskrárinnar með því að hafa látið farast fyrir að halda ráðherrafundi um mikilvæg málefni. Honum var þó ekki gerð refsing.

Hefur beðið hlutaðeigandi afsökunar 

„Ég er sannfærður um að þau sem voru til umfjöllunar – Geir H. Haarde, Ingibjörg Sólrún Gísladóttir, Árni M. Mathiesen og Björgvin G. Sigurðsson, hafa unnið að heilindum við erfið störf í yfirþyrmandi aðstæðum. Ég hef persónulega beðið þau afsökunar á ábyrgð minni og vil einnig gera það hér, með opinberum hætti.

Ég var nýlega spurður að því hvort ég væri enn sömu skoðunar varðandi ákvörðun nefndarinnar og Alþingis, um að vísa málum ráðherranna til Landsdóms og svarið er að ég er það ekki. Málið hefur lengi hvílt þungt á mér og þótt ekki sé hægt að taka aftur þessi mistök þá er mikilvægt að gangast við þeim,“ segir Magnús Orri.