Málið sé yfir­grips­meira en nokkur bjóst við

Þær Málfríður Þórðardóttir, Tinna Guðmundsdóttir og Hannesína Scheving Virgild Chester, sem allar hafa starfað í Flokki fólksins á Akureyri, hafa nú stigið fram og lýst lítilsvirðandi framkomu í sinn garð og í sumum tilfellum kynferðislegri áreitni.

Vísir hefur fjallað ítarlega um málið í dag:

Gríðarlega yfirgripsmikið

Í viðtali við fréttastofu RÚV í kvöld sagði Inga, sem þá hafði tekið sér hlé frá fundi með stjórn flokksins vegna málsins, að um væri að ræða afar yfirgripsmikið mál.

„Við erum í raun öll bara ofsalega sorgmædd og harmi slegin. Það er bara ömurlegt að vera komin í þessa stöðu, að þurfa að vera að fjalla um svona lagað þegar við unnum stórkostlegan sigur á Akureyri. Það var mikil gleði og væntingar, eins og fólk vildi og þau gerðu, tóku saman höndum og voru alveg frábær,“ sagði Inga í samtali við Ríkisútvarpið.

Fréttastofa hefur ekki náð í Ingu í kvöld, en í samtali við RÚV sagði hún að ekki yrði tekin ákvörðun um hvort vísa ætti mönnunum sem ásakanirnar beinast að úr flokknum.

„Þetta er mjög yfirgripsmikið, við erum með gríðarlegt magn af allskonar tölvupóstsendingum og furðulegheitum sem við eigum eftir að fara yfir. Eitt er alveg víst, að við munum alltaf standa með þolendum ef það er niðurstaðan.“

Gott að fá lögreglu að málinu

Hjá RÚV kom einnig fram að Jón Hjaltason, sem skipaði þriðja sæti á lista flokksins á Akureyri, myndi ásamt oddvitanum Brynjólfi Ingvarssyni, fara fram á lögreglurannsókn á ásökunum kvennanna. Inga segir það hið besta mál.

„Þá geta þessar konur tvær, sem sérstaklega urðu fyrir þessu áreiti, þá munu þær væntanlega stíga fram og fylgja því eftir. En það hefur hvergi komið fram að það hafi verið Jón Hjaltason sem var með kynferðislegt áreiti eða neitt slíkt, og við höfum aldrei gefið það út. Aldrei nokkurn tímann,“ segir Inga, sem telur frásagnir kvennanna trúverðugar.

Hún átti ekki von á því að niðurstaða næðist í málinu í kvöld, og sagði að málið hverfðist ekki eingöngu um þá Jón og Brynjólf. Hún vildi þó ekki, að svo stöddu, segja frá því hverjir fleiri ættu hlut að málinu, sem væri umfangsmeira en nokkurn hefði grunað.

„Auðvitað hafa fleiri í hópnum fundið fyrir vanlíðan og kvíða. Kvíða fyrir því að opna póstinn sinn á morgnana, þannig þetta er búið að skapa mikla vanlíðan, og miklu lengur en maður hefur gert sér grein fyrir. Ég gerði mér enga grein fyrir að það væri búin að vera svona langvarandi vanlíðan.“