Vill að Ragnar Þór leiði Alþýðusamband Íslands

Tæplega helmingur landsmanna treystir Drífu Snædal best til að leiða Alþýðusamband Íslands samkvæmt nýrri Gallúp könnun. Drífa sagði starfi sínu lausu 10. ágúst síðastliðinn vegna átaka innan verkalýðshreyfingarinnar sem hún segir að hafi dregið úr vinnugleði og baráttuanda. Könnunin var þó keyrð út fimm dögum áður en hún tók ákvörðun um starfslok.

Ragnar Þór Ingólfsson formaður VR nýtur þá tæplega 21% stuðnings aðspurðra en fast á hæla hans kemur Vilhjálmur Birgisson, formaður Starfsgreinasambandsins en tæp 18% sögðust treysta honum best til þess að gegna embætti forseta ASÍ.

„Ég fer svo sem ekkert í grafgötur með það að ég myndi vilja sjá Ragnar Þór Ingólfsson taka þetta embætti ef hann fengist til þess en ég veit ekki hver hugur hans er til þess í þeim efnum. Ragnar hefur staðið sig gríðarlega vel sem formaður VR sem er stærsta félagið innan Alþýðusambandsins og hefur alla burði til þess að láta gott af sér leiða í þessu veigamikla embætti,“ segir Vilhjálmur.

Inntur eftir viðbrögðum við gríðarlegum stuðningi sem Drífa nýtur samkvæmt könnuninni segist hann ekki gera neinar athugasemdir við hann. „Þetta er skoðun fólks en ég hef trú á því að almenningur hafi kannski ekki sömu upplýsingar um hvernig ágreiningurinn, samstarfið og áherslumunurinn hefur verið innan verkalýðshreyfingarinnar.“

Breytingar innan ASÍ forsenda framboðs

Ragnar Þór kveðst þakklátur fyrir sýndan stuðning og segir marga hafa komið að máli við hann og hvatt hann til að taka slaginn. Hann útilokar ekki framboð.

„Það er bara svo margt sem þarf að lagast innan Alþýðusambandsins og gera þarf ákveðnar breytingar á strúktúr þess til að fá meiri virkni þannig að hlutverk forsetans verði fyrst og fremst að sinna áherslumálum aðildarfélaganna, gæta jafnræðis og vera þetta sameiningartákn.“

Hann verði því að kanna hvort það sé vilji innan aðildarfélaganna að breytingar verði gerðar.

„Í óbreyttri mynd get ég sagt að ég hef takmarkaðan áhuga á þessu starfi en ef það er vilji til þess innan aðildarfélaganna að gera ákveðnar breytingar innan Alþýðusambandsins þannig að það virki og verði það afl sem því var ætlað að vera og að öll aðildarfélögin, hvort sem þau eru stór eða smá, njóti sannmælis og að áherslurnar fái að skína í gegn og að Alþýðusambandið verði ekki einhvers konar millilag þar sem áherslur einstakra blokka eða fylkinga verði alltaf ofan á.“

„Ef ég sé að það er vilji til að gera ákveðnar breytingar innan Alþýðusambandsins þá get ég sagt að ég hafi áhuga á að taka það verkefni að mér.“