Haller leysir Håland af hólmi

Hinn 28 ára gamli Haller fór mikinn í liði Ajax á síðustu leiktíð og skoraði nánast í hverjum einasta leik. Eftir mislukkaða dvöl hjá West Ham United á Englandi færði Haller sig til Hollands þar sem hann blómstraði. Þar skoraði hann samtals 47 mörk í 66 leikjum, þá lagði hann upp 16 mörk til viðbótar.

Haller hefur áður spilað í Þýskalandi en hann lék með Eintracht Frankfurt frá 2017 til 2019 áður en West Ham keypti hann dýrum dómum.

Haller á að leysa einn heitasta framherja Evrópu af hólmi og ljóst að það eru stórir skór sem hann þarf að fylla en Håland hefur verið hreint út sagt stórkostlegur undanfarin ár.