Róbert Ísak bætti eigið Ís­lands­met á HM í sundi

Heimsmeistaramót fatlaðra í sundi fer nú fram í Madeira í Portúgal. Sundkappinn Róbert Ísak hefur þar farið mikinn og bætti eigið Íslandsmet í 100 metra bringusundi í gærkvöld. Róbert Ísak hjó nærri meti sínu í undanrásum en sló það svo í úrslitum.

Synti hann á 1:08,36 mínútum og sló þar með eigið Íslandsmet. Raunar setti Róbert Ísak tvö met en millitími hans á 50 metrum í úrslitasundinu var einnig nýtt Íslandsmet. Synti hann fyrstu 50 metrana á 31,68 sekúndum.

Japaninn Naohide Yamaguchi sigraði á nýju mótsmeti þegar hann synti á 1:04.46 mín.

Nánar er fjallað um mótið á Facebook-síðu Íþróttasambands fatlaðra.