Prestar inn­flytj­enda segja ríkis­stjórnina ætla að senda fólk á götuna

Ása Laufey Sæmundsdóttir og Toshiki Toma, prestar innflytjenda og flóttafólks hjá Þjóðkirkjunni skrifa undir umsögnina en athugasemdir hennar segja þau grundvallast á kirkjulegum sjónarmiðum og byggjast á raunveruleika fólks sem óskar eftir vernd á Íslandi.

Hagsmunir ríkisstjórnarinnar í fyrirrúmi

Umsögnin snýr aðallega að þeim greinum frumvarpsins þar sem kveðið er á um 30 daga frest flóttafólks til að koma sér úr landi eftir endanlega synjun á umsókn þeirra um alþjóðlega vernd. Í þessum greinum er jafnframt lagt til að útlendingur skuli ekki teljast umsækjandi um alþjóðlega vernd þegar hann hefur fengið endanlega niðurstöðu í máli sínu á stjórnsýslustigi.

Prestarnir telja tilgang þessara breytinga skýran, að gera þá sem hafa fengið endanlega synjun á stjórnsýslustigi að „ólöglegum útlendingum“ sem íslenska ríkið sé ekki lengur skyldugt til að sjá um.

Þeir telja breytingartillöguna, sem snýr að lagaákvæðum um efnismeðferð umsókna um alþjóðlega vernd, einfaldlega þýða að lögin útiloki umsækjanda sem þegar hefur öðlast vernd í öðru ríki frá því að fá efnislega meðferð á umsókn sinni hérlendis.

Þessi breyting byggist á hagsmunum ríkisstjórnarinnar en ekki á hlutlausum skilningi á aðstæðum flóttafólks í Evrópu eða virðingu fyrir mannréttindum þeirra.

„Hvernig sér manneskja fyrir sér hafi hún ekki framfærslu og húsaskjól?“ spyrja prestarnir og minna á synjun Útlendingastofnunar á umsóknum tugum umsækjenda um alþjóðlega vernd sumarið 2021.

„Það vakti gríðarlega óánægju almennings í samfélaginu“ segir í umsögninni

Brjóti gegn kristilegu siðgæði og miskunnarsemi

Prestarnir lýsa því yfir að þessi breyting brjóti í bága við kristilegt siðgæði og miskunnsemi.

„Afleiðingarnar eru ófyrirséðar, en afar dýrkeyptar fyrir fólk sem fór ekki sjálfviljugt frá sínu heimalandi, heldur var að flýja óþolandi og óbærilegar aðstæður. Okkur þykir ljóst að verði þessi málsliður samþykktur muni íslenska ríkið brjóta gegn þeim mannréttindasáttmálum sem stjórnvöld hafa heitið að virða.“ segir í umsögninni

Þá er lagt er til að dómstólar meti réttmæti synjunar frekar en Útlendingastofnun eða Kærunefnd útlendingamála.

„Jafnvel þótt við viðurkennum nauðsyn þess að setja takmarkanir á réttindi umsækjanda um alþjóðlega vernd sem hefur fengið endanlega synjun, teljum við nauðsynlegt að þriðji aðili, t.d. héraðsdómur, dæmi um hvort takmörkunin sé rétt og sanngjörn eða ekki. Slíkur dómur ætti ekki að vera í höndum framkvæmdaraðila eins og Útlendingastofnunnar, að okkar mati.“

Stuðningur prestanna við góða og ítarlega umsögn Rauða Krossins um frumvarpið ítrekaður að öðru leyti.

„Bæn okkar er sú að Guð blessi Alþingi íslendinga og mikilvæg störf þess.“ segir að lokum.