Að­eins í annað sinn í sögunni sem landi er vikið úr Mann­réttinda­ráðinu

Meðal þeirra landa sem greiddu atkvæði gegn því að víkja Rússum úr ráðinu var Kína en sendiherra Kína sagðist telja að um fljótfærið skref væri að ræða sem komi aðeins til með að kasta olíu á eldinn. Önnur lönd sem greiddu atkvæði á móti voru Hvíta-Rússland, Norður-Kórea, Víetnam, auk ýmissa annarra landa í Afríku og Austur-Evrópu. Meðal landa sem sátu hjá voru Indland, Egyptaland og Suður-Afríka.

Dmytro Kuleba, utanríkisráðherra Úkraínu, fagnaði niðurstöðunni en hann sagði stríðsglæpamenn ekki eiga erindi í ráð sem hafi það að markmiði að vernda mannréttindi. Þá hafa fleiri utanríkisráðherrar fagnað niðurstöðunni, þar á meðal Anthony Blinken, utanríkisráðherra Bandaríkjanna, en hann sagði það hafa verið það eina rétta í stöðunni.

Kallað eftir atkvæðagreiðslu eftir fregnum af stríðsglæpum

Linda Thomas-Greenfield, sendiherra Bandaríkjanna hjá Sameinuðu þjóðunum, kallaði eftir því fyrr í vikunni að Rússlandi yrði vikið úr ráðinu vegna grófra og kerfisbundra brota á mannréttindum í Úkraínu og tók meðal annars Liz Truss, utanríkisráðherra Bretlands, undir ákallið. Hver þjóðarleiðtoginn á fætur öðrum hefur nú stigið fram og sakað Rússa um stríðsglæpi, einna helst eftir að fregnir bárust af hryllingnum í Bucha.

Ákveðið var að greiða atkvæði um tillöguna í dag en samþykki þurfti frá tveimur þriðju aðildarríkjanna 193 til að tillagan gengi eftir, þar sem atkvæði þeirra sem sitja hjá telja ekki með. Það náðist í dag 93 greiddu atkvæði með á meðan 24 voru á móti.

Sergiy Kyslytsya, sendiherra Úkraínu hjá Sameinuðu þjóðunum, hvatti aðildarríkin fyrir fundinn til að samþykkja tillöguna en hann sagði heimsbyggðina standa á mikilvægum krossgötum. Það væri sjaldgæft og stórtækt að vísa landi úr ráðinu en að aðgerðir Rússa töluðu sínu máli.

„Það eina sem þið þurfið að gera er að ýta á JÁ hnappinn, til að bjarga Mannréttindaráðinu og mörgum lífum víða um heim og í Úkraínu. Aftur á móti með því að ýta á NEI þá eruð þið að taka í gikkinn, og það táknar rauðan punkt á skjánum. Rauðan eins og blóð hinna saklausu sem hafa látist,“ sagði Kyslytsya.

Neita alfarið sök og segja Bandaríkin vilja öðlast meiri völd

Yfirvöld í Rússlandi hafa þó þvertekið fyrir það að hafa ráðist á saklausa borgara og sakað úkraínskar hersveitir um að sviðsetja aðstæður til að mynda í Bucha.

Gennady Kuzmin, sendiherra Rússlands hjá Sameinuðu þjóðunum, sagði ákvörðunina um að víkja Rússlandi úr ráðinu ekki hafa neitt að gera með aðgerðir þeirra í Úkraínu, heldur væri um að ræða tilraun Bandaríkjanna til að öðlast frekari völd.

„Þetta er hvorki staður né stund fyrir leikaraskap,“ sagði Kuzmin og bætti við að það myndi skapa hættulegt fordæmi að víkja þeim úr ráðinu. „Ég kalla eftir því að allir sem eru viðstaddir íhugi alvarlega ákvörðun sína og kjósi gegn tilraun Vesturlandanna og þeirra bandamanna til að eyðileggja núverandi mynd mannréttinda.“

Alls eiga 47 lönd sæti í ráðinu en þau eru skipuð til þriggja ára í senn. Rússland var á öðru ári þegar þeim var vikið úr ráðinu í dag. Þetta er í annað sinn sem landi er vikið úr ráðinu en Líbýu var vikið úr ráðinu árið 2011. Þetta er í fyrsta sinn sem land sem á sæti í Öryggisráði Sameinuðu þjóðanna er vikið úr ráði á vegum stofnunarinnar. 

Hægt er að fylgjast með nýjustu vendingum í Úkraínuvaktinni hér á Vísi.