Lítil á­hætta fólgin í breytingu á sölu Parkódíns en mikil­vægt að hafa varann á

Heilsugæsla höfuðborgarsvæðisins greindi frá því í tilkynningu í morgun að breytingin hafi verið gerð til að létta undir með heilsugæslunni þar sem margir eru að greinast með veiruna og hafa læknar ávísað lyfinu til að slá á hósta.

Nokkur umræða hefur skapast á samfélagsmiðlum um að þessi breyting gæti haft slæm áhrif þar sem kódein er ávanabindandi morfínlyf. Valgerður bendir á að Parkódín hafi ekki verið lyfseðilsskylt á tímabili en því var breytt árið 2005.

„Þegar það var ekki lyfseðilsskylt, og í sjálfu sér ekkert eftirlit með því hvað fólk fékk mikið, þá var lítill hópur sem var í vandræðum með það og var kannski að fara í mörg apótek á dag að kaupa og voru virkilega háð kódeininu,“ segir Valgerður Rúnarsdóttir, yfirlæknir á Vogi.

Til að hægt sé að kaupa lyfið í lausasölu þarf að framvísa vottorði úr Heilsuveru um staðfest smit sem er ekki eldra en mánaðargamalt. Hver einstaklingur getur keypt tíu töflur af lyfinu að fengnu samþykki lyfjafræðings og verður hver ávísun skráð.

Hafa ekki undan við að skrifa út lyf

Sigríður Dóra Magnúsdóttir, framkvæmdastjóri lækninga hjá Heilsugæslu höfuðborgarsvæðisins, segir að breytingin hafi verið gerð þar sem stöðvarnar hafa ekki undan við að senda lyf. Aðspurð um hvort fólk geti misnotað þetta fyrirkomulag segir Sigríður það vissulega hægt.

„Með þessa lyfjaávísun eins og allar lyfjaávísanir, ef fólk ætlar að svindla út og ná sér í meira lyf en það þarf þá getur það gert það,“ segir Sigríður en bætir við að takmörk séu á og að fólk geti ekki gengið að því sem gefnu að það fái að kaupa lyfið.

„Þú þarft að vera með greiningu og það er lyfsalinn sem tekur ákvörðun um að afgreiða lyfið, þannig hann verður að hafa forsendur til þess,“ segir Sigríður. Um er að ræða sama fyrirkomulag og er þegar til staðar til að mynda með neyðarpilluna en lyfsalinn getur einnig séð hvort einstaklingur hafi fengið lyfið nýlega og neitað að gefa það út á þeim forsendum.

Valgerður segir að með þeim skilmerkjum sé takmörkuð áhætta á ferð, en þó einhver. Mikilvægt sé að um sé að ræða lítið magn og að fylgst sé með ávísunum, þannig fólk flakki ekki milli apóteka og fái tíu töflur á hverjum degi.

„Það er full ástæða til þess að vera meðvitaður um það að þetta sé ópíóði, þetta er ávanabindandi og á að nota í sem allra stystan tíma og sem fæstar töflur,“ segir Valgerður. „Þetta er ópíóði, þó þetta sé lítið magn, og hann getur valdið fíkn og ávanabindingu.“