Hvöss norðan­átt víða á landinu

Þetta kemur fram á vef Veðurstofunnar. Þar segir að það létti til sunnan- og vestanlands með vetrarsól.

„Minnkandi éljagangur á Norður- og Austurlandi. Það kólnar í veðri, búast má við frosti kringum 10 stigin inn til landsins í kvöld.

Þegar þetta er skrifað er enn ein vaxandi lægðin við Nýfundnaland og stefnir hún til norðausturs í dag og nálgast okkur. Þessi lægð veldur óveðri á landinu á morgun. Þá má búast við suðaustan stormi eða roki með snjókomu og síðar talsverðri slyddu eða rigningu. Hlýnar í veðri, hiti 1 til 6 stig síðdegis. Úrkomulítið um landið norðaustanvert og hiti kringum frostmark.

Undir kvöld á morgun snýst í allhvassa sunnanátt á Suður- og Vesturlandi með skúrum eða slydduéljum. Snýst einnig í hægari sunnanátt á norðan- og austanverðu landinu seint annað kvöld,“ segir í hugleiðingum veðurfræðings.

Búið er að gefa út gular viðvaranir fyrir höfuðborgarsvæðið, Suðurland, Faxaflóa, Breiðafjörð, Vestfirði og Miðhálendi frá morgundeginum.

Veðurhorfur á landinu næstu daga

Á laugardag: Sunnan og suðvestan 8-15 m/s og él, en bjartviðri um landið NA-vert. Kólnandi, frost víða 0 til 5 stig um kvöldið.

Á sunnudag: Sunnan 3-10 og dálítil él, en léttskýjað á N- og A-landi. Vaxandi austanátt syðst um kvöldið. Frost 0 til 8 stig, kaldast í innsveitum fyrir norðan.

Á mánudag: Norðaustanátt og snjókoma, en úrkomulítið V-til á landinu. Hiti um eða undir frostmarki. Slydda eða rigning um tíma SA-lands og frostlaust þar.

Á þriðjudag: Suðlæg átt, stöku él og hiti kringum frostmark, en yfirleitt léttskýjað á NA- og A-landi með frosti að 5 stigum.

Á miðvikudag: Suðaustanátt og slydda eða rigning, en þurrt N-lands.