Hvergerðingar taka höndum saman og krakkarnir þakklátir

„Þetta er náttúrlega alveg skelfileg aðkoma, að koma hingað upp eftir og allt hrunið niður. En svona er þetta bara. Við búum hér og við þessu mátti kannski búast,” segir Birgir Helgason Hvergerðingur.

Birgir hefur verið virkur í íþróttastarfi eldri borgara í Hamarshöll undanfarin ár. Hann segir afar slæmt að íþróttirnar leggist nú af en ætlar að vera þeim mun virkari í heimaæfingunum. Hins vegar hafi þetta ekki síður áhrif á félagslegu hliðina.

„Við höfum verið hérna, kannski tuttugu, þrjátíu manns og upp í sextíu manns, sem höfum hist og gengið innandyra í öllum veðrum. Þannig höfum við hist þrisvar í viku,” segir hann.

Hvergerðingar ætla hins vegar ekki að láta þetta á sig fá og á samfélagsmiðlum býðst hver á fætur öðrum til þess að gefa vinnu sína í þeim tilgangi að reisa höllina eins hratt og hægt er. Þannig má sjá fólk bjóða fram aðstoð við smíði, pípulagningar, eldamennsku og þannig mætti áfram telja. „Þetta er bara jákvæðni, ég held það dugi ekkert annað,“ segir Birgir.

Friðrik Sigurbjörnsson, forseti bæjarstjórnar í Hveragerði, segist þakklátur fyrir samstöðuna.

„Við höfum fundið mikinn stuðning, bæði hér innanbæjar frá einkaaðilum, verktökum og fleirum en einnig frá nágrannasveitarfélögum sem hafa viljað styðja við bakið á okkur. Við munum alveg pottþétt nýta okkur það,” segir Friðrik.

Hræðilegt áfall

Hamarshöllin gegnir veigamiklu hlutverki í Hveragerði enda fer nær allt íþróttastarf þar fram. Sævar Helgason, skólastjóri Grunnskólans í Hveragerði, segir aðað þetta muni vafalaust hafa áhrif.

„Þetta er hræðilegt áfall fyrir samfélagið en ég er ekki viss um að þetta sé farið að tikka inn strax. Þetta er nýskeð og við erum ekki farin að finna fyrir þessu, það var vetrarfrí í gær þegar ósköpin dundu yfir og ég held að krakkarnir muni taka eftir þessu í dag. Þeir eiga að fara á fótboltaæfingu úti á sparkæfingu á eftir þannig að það verður áhugavert að taka á móti köldum puttum og tám seinni partinn í dag,” segir Sævar. Hann, líkt og fleiri Hvergerðingar, nefnir sérstaklega samstöðu bæjarbúa.

„Það sem þjappar hópum mest saman er sameiginlegur óvinur eða andstæðingur og þarna var rokið sameiginlegur óvinur og andstæðingur samfélagsins. Hér eru iðnaðarmenn farnir að bjóða hundrað tíma í fría vinnu og alls konar og það verður spennandi að sjá hvaða skref verða stigin næst.”

„Bara með gott hjarta“

Fótboltakrakkar í skólanum, þau Eva Lillý, Hekla Maren, Heba Rut, Valdimar Helgi, Guðmundur Óli, Viktor Óli og Elmar Smári segja þetta virkilega leiðinlegt enda hafi þau lagt mikið á sig í íþróttum. Þau segjast hafa orðið bæði leið og pirruð. 

„Við erum búin að leggja svo mikið á okkur og reyna svo ógeðslega mikið.”

Hins vegar eru þau sérstaklega þakklát íþróttafélögunum á Selfossi og Akranesi fyrir að bjóða fram aðstöðu á meðan fundin verður ný lausn.

„Þeir eru bara góðir að leyfa okkur það og eru með gott hjarta.”