Bílarnir ráði við salt­kassana og undan­þága veitt fyrir nagla­dekk

Þetta kemur fram í tilkynningu frá Reykjavíkurborg sem Hjalti Jóhannes Guðmundsson, skrifstofustjóri reksturs og umhirðu borgarlandsins, sendi fjölmiðlum. Tilefnið er umfjöllun Morgunblaðsins sem vísaði til bréfs starfsmanna í vetrarþjónustu hjá borginni. Í bréfinu nefna þeir hringlandahátt, þekkingar- og skilningsleysi á verkefninu og virðingarleysi í sinn garð.

Þá er í bréfinu kvartað undan mismunun, hroka og einelti sem séu rótgróin í Reykjavíkurborg. Bréfritarar vísa til þess að þeir séu ekki langskólagengnir.

„Vetrarþjónusta gatna er öryggismál og mikið kapp lagt á að henni sé vel sinnt þannig að umferðin gangi sem greiðlegast fyrir sig á hverjum tímapunkti. Undirritaður vill hrósa öllu því fólki sem hefur komið að vetrarþjónustu í Reykjavík undanfarna daga og vikur fyrir frábært starf í erfiðum aðstæðum,“ segir Hjalti í tilkynningu til fjölmiðla.

Hann segir fjóra starfsmenn vetrarþjónustu gatna hafa sent bréf þann 24. janúar með athugasemdum um ýmis atriði sem þeir telji að megi laga.

„Þar komu fram ábendingar sem eru í skoðun, sumt hefur þegar verið lagfært og annað er í ferli. Bréfinu hefur ekki verið svarað með formlegum hætti en það ber að árétta að ávallt er brugðist við ábendingum um mál sem hafa með öryggi starfsfólks að gera.“

Bréfaritarar segja að illa hafi verið staðið að útboði fyrir bíla í vetrarþjónustu síðastliðið sumar. Atvinnubílar til vetrarþjónustu hafi verið boðnir út á árinu 2020.

„Í útboðinu voru gerðar kröfur um ýmsa þætti er lúta að sértækri notkun bílanna. Ein af kröfunum var burðargeta sem skyldi nema 1000 kg að lágmarki. Allir bílar sem útboðshafi bauð fyrir vaktmenn í vetrarþjónustu þola 1180 kg í burð. Ennfremur var boðið upp á loftpúðafjöðrun sem gagnast við erfiðar aðstæður.“

Þá kvörtuðu bréfritarar sömuleiðis yfir því að bann á nagladekkjum undir eftirlitsbílum í vetur hafi gert stöðuna enn verri. Enda reyni mikið á bílana í ófærð og glerhálku.

„Starfsmenn vetrarþjónustu gatna óskuðu eftir að hafa nagladekk undir bílum sem bera saltkassa. Þrátt fyrir stefnu borgarinnar að draga úr notkun nagladekkja var veitt undanþága fyrir þjónustu undanfarabíla, þar á meðal fyrir þá sem flytja saltkassa. Saltgeymslur Reykjavikurborgar eru staðsettar í bröggum við Þórðarhöfða. Þeir eru vissulega gamlir en hafa fengið nauðsynlegt viðhald þegar þarf. Það hefur alltaf verið gert við leka og annað sem gæti valdið tjóni eins fljótt og auðið er. Sama má segja um pækilstöðina sem nefnd er.“

Annað sem komi fram í bréfinu séu mannauðsmál sem eigi réttan feril innan Reykjavíkurborgar og verði ekki rædd opinberlega.