Segja á­sakanir fyrr­verandi stjórnar­manns til­hæfu­lausar

Öryrkjabandalag Íslands segir að fyrrum stjórnarmaður í Brynju - Hússjóði Öryrkjabandalagsins hafi farið fram með innistæðulausar ásakanir en umræddur stjórnarmaður hefur sakað stjórn ÖBÍ og formann bandalagsins um bolabrögð.

„Öryrkjabandalag Íslands harmar að fyrrum stjórnarmaður í Brynju- hússjóði Öryrkjabandalagsins, hafi ákveðið að fara fram með rakalausar og algerlega innistæðulausar ásakanir um sjóðinn og stjórn hans, sem og nafngreinda einstaklinga í stjórn ÖBÍ,“ segir í tilkynningu bandalagsins sem send var á fjölmiðla í dag.

Greint var frá því í Morgunblaðinu í dag að Garðar Sverrisson, sem hefur setið í stjórn Hússjóðs Öryrkjabandalagsins um nokkurt skeið, hafi skrifað bréf til aðildarfélaga ÖBÍ um að upp hafi komið „alvarlegt spillingarmál.“

Að því er kemur fram í frétt Morgunblaðsins var Garðari tilkynnt af formanni ÖBÍ, Þuríði Hörpu Sigurðardóttur, að honum og tveimur öðrum stjórnarmönnum yrði skipt út fyrir nýja. ÖBÍ hefur verið stefnt fyrir dómi vegna málsins, af umboðslausri stjórn Hússjóðsins, þar sem krafist er að afturköllun umboðs þeirra þriggja verði ógilt. Þá er skorað á bandalagið að kjósa með lögmætum hætti í stjórnina að nýju.

Stjórnin í dag óumdeild

Í yfirlýsingu um málið í dag segir að það hafi verið einróma ákvörðun stjórnar ÖBÍ að víkja Garðari úr stjórn Brynju þar sem hann hafði „hafði brotið gróflega gegn skyldum sínum og brugðist trausti ÖBÍ,“ eins og það er orðað í yfirlýsingunni.

„Stjórn Brynju- hússjóðs Öryrkjabandalagsins er í dag skipuð mjög hæfu fólki og er óumdeild. Rekstur sjóðsins er traustur og í góðum höndum,“ segir enn fremur í yfirlýsingunni.

Bandalagið greindi frá því í tilkynningu fyrr í mánuðinum að fyrrverandi stjórnarformaður Brynju hafi verið látinn víkja þar sem hann virti að vettugi ákvarðanir bandalagsins um skipun nýrra stjórnarmanna. Þá hafði runnið út umboð tveggja aðalmanna og eins varamanns um áramótin.

„Fráfarandi stjórnarformaður Brynju – hússjóðs ÖBÍ, hvers umboð var ekki runnið út, neitaði að una einróma kjöri nýrra stjórnarmeðlima og kom þannig í veg fyrir að stjórnin gæti sinnt lögbundnu hlutverki sínu,“ segir í tilkynningu á vef bandalagsins frá 3. febrúar.