Þorleifur: „Hraunaði yfir stelpurnar í hálfleik“

„Mér fannst leikurinn mjög lélegur fyrir utan þriðja leikhluta. Ég vonaðist eftir því að við myndum halda áfram að spila vel í fjórða leikhluta en það gekk alls ekki og Fjölnir stakk af,“ sagði Þorleifur svekktur með síðasta fjórðung. 

Grindavík vann þriðja leikhluta og minnkaði forskot Fjölnis niður í sex stig en þá virtist blaðran vera sprungin.

„Það fór mikil orka í að vera elta svona lengi. Í þriðja leikhluta fórum við í svæðisvörn sem við höfðum lítið æft en það virkaði. Í fjórða leikhluta þá fjaraði orkan út og Fjölnir gekk á lagið.“

Þorleifur var afar ósáttur með hvernig Grindavík spilaði í fyrri hálfleik og lét hann sitt lið heyra það í hálfleik.

„Mér fannst vanta viljann til að spila í fyrri hálfleik. Ég hraunaði vel yfir stelpurnar í hálfleik og sagði ýmislegt sem ég get ekki sagt í sjónvarpi. Það virkaði en svo var orkan búin í fjórða leikhluta og því fór sem fór,“ sagði Þorleifur að lokum.