Mun hrapa í Kyrra­haf árið 2031

Til stendur að taka stöðina af sporbaug sínum í janúar 2031 og þá mun hún falla hratt til jarðar og lenda á afviknum stað í Kyrrahafinu, sem kallast Point Nemo og hefur oft verið notaður til að beina geimrusli sem fellur til jarðar. 

Staðurinn þykir hentugur til slíks þar sem rúmir 2.700 kílómetrar eru í næstu mannabyggð. 

Að sögn NASA mun stofnunin reiða sig á einkageirann í meira mæli þegar kemur að geimferðum því ekki stendur til að setja aðra stöð á sporbaug um jörðu. Forsvarsmenn NASA hafa þó unnið með einkafyrirtækjum að þróun nýrra geimstöðva á braut um jörðu og má þar nefna geimferðamennskufyrirtækið Axiom, Blue Origin og Northrop Grumman.

Forsvarsmenn þess opinberuðu nýverið að þeir ætluðu sér að koma upp tökuveri fyrir kvikmyndir og tónlist í geimnum. Það ætti að vera hluti af nýrri geimstöð sem verður í fyrstu tengd Alþjóðlegu geimstöðinni.

Geimstöðin, sem er á stærð við amerískan fótboltavöll fer umhverfis jörðina á níutíu mínútna fresti og allar götur frá árinu 2000 hefur einhver geimfari verið þar um borð. Upprunalega átti geimstöðin að vera í notkun í einungis fimmtán ár en forsvarsmenn NASA segjast vongóðir um að hún muni endast til 2030, þrátt fyrir viðvaranir embættismanna í Rússlandi um að geimstöðin væri úr sér gengin.

Í frétt Space.com er vitnað í skýrslu sem NASA birti í síðasta mánuði en þar segir að stofnunin gæti sparað allt að 1,8 milljarð dala með að hætta rekstri geimstöðvarinnar og þann pening væri hægt að nota í annað.

Því fer að koma að leiðarlokum hjá geimstöðinni en forsvarsmenn NASA tilkynntu í fyrra að breytingar hefðu verið gerðar á áherslum stofnunarinnar. Markmiðið væri að leggja meiri áherslur á lengri geimferðir og þróun tækni sem þarf til þeirra.

Má þar nefna mannaðar ferðir til tunglsins sem NASA vill hefja á þessum áratug. Þá vill NASA nota tunglið sem stökkpall lengra út í sólkerfið, eins og til Mars. Rannsóknir sýna að finna má ís í gígum á pólum tunglsins og þann ís má bæði nota til að framleiða eldsneyti fyrir geimför og halda við byggð manna á tunglinu.

Fyrsta geimskoti Artemis-áætlarinnar, sem gengur út á að koma mönnum til tunglsins hefur verið frestað til mars. Það geimskot kallast Artemis-1 og mun bera ómannaða Orion-geimfar á braut um tunglið. Í Artemis-2 verða geimfarar sendir á sporbraut um tunglið en Artemis-3 á að ganga út á að lenda mönnum aftur á tunglinu.

Ný geimstöð þegar á sporbraut

Smíði nýrrar geimstöðvar á braut um jörðu hófst í fyrra en hún er smíðuð af Kínverjum. Þegar þetta er skrifað eru þrír geimfarar um borð í Tiangong geimstöðinni. Þeim var skotið á loft í október og eiga þau að vera í geimstöðinni í sex mánuði og vinna að áframhaldandi smíði hennar.

Sjá einnig: Kínverjar spýta í lófana í geimnum

Kínverjar og Rússar hafa einnig gert samkomulag um að vinna í sameiningu að því að koma upp rannsóknarstöð á yfirborði tunglsins.