Kallar eftir breytingum á þingi og nýjum kosningalögum

Í ræðu sem hann hélt í Atlanta í Georgíu sagðist Biden hafa átt hljóðlátar umræður við marga öldungadeildarþingmenn á undanförnum mánuðum.

„Ég er þreyttur á því að hafa hljótt,“ sagði Biden. Ég mun ekki gefa eftir. Ég mun ekki hopa.“

Biden var öldungadeildarþingmaður í áratugi og gagnrýndi hann þingdeildina í ræðu sinni. Hann sagði hana hafa versnað til muna og sagði að fyrir ekki svo löngu síðan hefði umræða um kosningarétt fólks ekki fylgt flokkslínum eins og nú.

Hlusta má á ræðu Kamölu Harris, varaforseta, og svo ræðu Bidens hér að neðan.

Hann rifjaði upp að hann hefði sjálfur unnið með mjög umdeildum þingmönnum sem aðhylltust aðskilnaðarstefnu að því að semja ný lög sem forsetar Repúblikanaflokksins skrifuðu svo undir. Nú sé reglan um aukinn meirihluta ítrekað notuð til að stöðva gang frumvarpa og jafnvel koma í veg fyrir umræðu um þau.

„Þetta skiptir máli fyrir okkur öll. Markmið fyrrverandi forsetans [Donalds Trump] og bandamanna hans er að útiloka alla þá sem kjósa gegn honum. Það er svo einfalt,“ sagði Biden.

Óttast aðgerðir Repúblikana

Þessi yfirlýsing Bidens er til komin vegna aðgerða Repúblikana í fjölmörgum ríkjum Bandaríkjanna sem snúa að kosningum.

Viðleitni þeirra snýr meðal annars að því að gera flokksmeðlimum auðveldara að snúa niðurstöðum kosninga í Bandaríkjunum. Hún byggir á grunni ósanninda Donalds Trump, fyrrverandi forseta, um að umfangsmikið svindl hafi kostað hann sigur í forsetakosningunum 2020 gegn Joe Biden.

Þetta á við í minnst nítján ríkjum þar sem Repúblikanar eru í meirihluta á ríkisþingjum.

Margar af þessum aðgerðum munu koma niður á fólki sem er heilt yfir talið líklegra til að kjósa Demókrataflokkinn. Þar á meðal eru þeldökkir Bandaríkjamenn í þéttbýlum kjördæmum.

Til marks um það má benda á að í fjórum fjölmennustu sýslum Atlanta í Georgíu hefur móttökustöðum fyrir utankjörfundaratkvæði verið fækkað úr 94 árið 2020 í 23 í næstu kosningum.

Georgía skipti gífurlegu máli í síðustu kosningum og skyldu einungis tæplega þrettán þúsund atkvæði þá Biden og Trump að. Trump-liðar vörðu gífurlega miklu púðri í að reyna að breyta niðurstöðu kosninganna þar.

Sjá einnig: Repúblikanar vilja stjórna hverjir kjósa og hvernig atkvæði eru talin

Demókratar hafa reynt að koma frumvarpi um lög um kosningar í gegnum þingið en eftir þrjár atkvæðagreiðslur í öldungadeildinni hefur það ekki gengið.

Frumvarpið kallast á ensku „Freedom to vote act“ og myndi gera töluverðar breytingar á fyrirkomulagi kosninga í Bandaríkjunum. Það hefur tekið nokkrum breytingum frá því það var fyrst lagt fram í fulltrúadeildinni í mars.

Það var samið í kjölfar árásar stuðningsmanna Donalds Trump, fyrrverandi forseta, á þinghús Bandaríkjanna þann 6. janúar. Fólkið réðst á þingið með því markmiði að koma í veg fyrir formlega staðfestingu úrslita forsetakosninganna í nóvember í fyrra á grundvelli ítrekaðra ósannra yfirlýsinga Trumps og bandamanna hans um að umfangsmikið kosningasvindl hefði kostað hann sigur.

Chuck Schumer, leiðtogi Demókrata í öldungadeildinni, sagði í dag Demókratar yrðu að koma frumvarpinu í gegnum þingið.

Nýjasta útgáfa frumvarpsins hefði töluvert minni áhrif en fyrsta útgáfa þess. Það sem frumvarpið myndi meðal annars gera er að leggja landlægar reglur varðandi framkvæmd kosninga í Bandaríkjunum, takmarka möguleika embættismanna til að teikna kjördæmi upp flokkum sínum í hag og auka gagnsæi varðandi framlög sem snúa að kosningum, svo opinbera þyrfti frá hverjum slík framlög komi.

Frumvarpið á einnig að gera kjördag að frídegi í Bandaríkjunum.

Sjá einnig: Kosningafrumvarp Demókrata stöðvað í þriðja sinn

Litlar líkur eru þó á því að Demókratar muni gera breytingar á reglunni um aukinn meirihluta þar sem þingmenn flokksins eru ekki sammála um að þau eigi að gera það. Joe Manchin, þingmaður frá Vestur-Virginíu sem þykir íhaldssamari en gengur og gerist í Demókrataflokknum, sagði til að mynda í dag að ekki ætti að gera neinar breytingar án aðkomu Repúblikanaflokksins.

Þar á bæ eru allir þingmenn andvígir því að gera umræddar breytingar.

Þá bendir AP fréttaveitan á að ef kosningafrumvarpið færi í gegn væri það orðið of seint til að hafa áhrif á þingkosningarnar í nóvember.