Þórunn Eva er fram­úr­skarandi ungur Ís­lendingur

Forseti Íslands, Guðni Th. Jóhannesson, afhenti verðlaunin í Safnahúsinu við Hverfisgötu ásamt Ríkeyju Jónu Eiríksdóttur, landsforseta JCI í gær. Verðlaunagripurinn er einstakt listaverk eftir glerlistamanninn Jónas Braga Jónasson.

„Verðlaunin eru bæði hvatning fyrir þessa framúrskarandi einstaklinga til áframhaldandi starfa og á sama tíma innblástur og hvatning okkar allra að leggja okkar af mörkum til að byggja betra samfélag,“ segir í tilkynningu frá JCI á Íslandi.

Þórunn Eva skrifaði bókina Mía fær lyfjabrunn og stofnaði góðgerðarfélagið Mía Magic í kjölfarið. Hún er sjálf foreldri langveikra barna og hefur síðustu mánuði útbúið sérstök Míubox, sem afhent eru langveikum börnum og foreldrum þeirra.

Þórunn Eva segist alls ekki hafa búist við því að vinna verðlaunin enda hafi margir flottir einstaklingar verið tilnefndir í ár. Hún segist ætla að halda áfram að vinna að málefninu en ný bók er í smíðum. Líkt og hin fyrri, snýr bókin að málefnum langveikra barna en verður þó ekki eins.

„Hún verður um töfraheim ónæmiskerfisins, þannig að hún er svona aðeins að fræða krakka um ónæmiskerfið og fer aðeins inn á það efni,“ segir Þórunn Eva létt í bragði og bætir við að hún vilji ekki gefa of mikið upp um efni bókarinnar.

Þórunn Eva segir að viðtökurnar fyrir bókina um Míu hafi verið vonum framar:„Fyrir krakka sem eru rosa mikið inni [á spítala] þá vantaði eitthvað smá auka. Svo hefur þetta einhvern veginn sprungið út og það finnst öllum Mía geggjuð. Það eru allir sem geta samsamað sig með henni á einhvern hátt,“ segir Þórunn Eva þakklát.

Þórunn Eva hefur einnig staðið að Míuverðlaununum en Sigrún Þóroddsdóttir, barnahjúkrunarfræðingur á Barnaspítala Hringsins, hlaut verðlaunin fyrr á þessu ári. Með Míuverðlaununum er heilbrigðisstarfsfólk verðlaunað. Þórunn segir við að mögnuð vinna fari fram í heilbrigðiskerfinu en það jákvæða fái sjaldan að heyrast.

„Það er alltaf verið að rakka heilbrigðiskerfið niður en það er samt líka svo rosa mikið margt gott gert. Ef að starfsfólkið sem vinnur þessa vinnu fær alltaf bara að heyra þetta neikvæða þá gefst það bara upp. Verðlaunin voru upphaflega hugsuð sem gulrót fyrir fólkið sem er að vinna á spítölunum.“

Tíu hlutu tilnefningu sem framúrskarandi ungir íslendingar árið 2021. Hér að neðan má sjá tilnefningarnar.

Björt Sigfinnsdóttir

Störf /afrek á sviði menningar

Chanel Björk Sturludóttir

Framlag til barna, heimsfriðar og/eða mannréttinda

Eyþór Máni Steinarsson

Störf á sviði viðskipta, frumkvöðla og/eða hagfræði

Hanna Ragnarsdóttir

Störf á sviði tækni og vísinda

Heiðrún Birna Rúnarsdóttir

Störf á sviði siðferðis og/eða umhverfismála

Isabel Alejandra Diaz

Leiðtogar/afrek á sviði menntamála

Sindri Geir Óskarsson

Störf á sviði mannúðar eða sjálfboðaliðamála

Tanja M. Ísfjörð Magnúsdóttir

Framlag til barna, heimsfriðar og/eða mannréttinda

Þorbjörg Þorvaldsdóttir

Framlag til barna, heimsfriðar og/eða mannréttinda

Þórunn Eva G Pálsdóttir

Framlag til barna, heimsfriðar og/eða mannréttinda