Þorvaldur hættir að þjálfa Stjörnuna en verður rekstrarstjóri hjá félaginu

Þorvaldur var ráðinn þjálfari Stjörnunnar síðasta haust við hlið Rúnars Páls Sigmundssonar. Hann stýrði liðinu svo einn eftir að Rúnar Páll hætti eftir einn leik í Pepsi Max-deildinni.

Stjarnan var í neðri hluta deildarinnar allt tímabilið og endaði að lokum í 7. sæti sem versti árangur liðsins síðan 2010.

„Ég hef notið tímans vel og þó svo að tímabilið hafi gengið upp og ofan þá er Stjarnan öflugt félag með ótrúlega sterkan kjarna starfsmanna og sjálfboðaliða sem hafa búið til umgjörð í kringum fótboltann í Garðabæ sem er eftirsóknarvert umhverfi að starfa í,“ segir Þorvaldur í yfirlýsingu Stjörnunnar.

„Það kemur oft best í ljós þegar menn lenda í brekku úr hverju þeir eru gerðir og það var algerlega til fyrirmyndar hvernig félagið hélt á sínum málum núna í sumar og ég veit að sú stefna sem er til staðar er líkleg til afreka enda efniviðurinn nægur og kjarni liðsins öflugur.“

Í yfirlýsingunni þakkar Helgi Hrannarr Jónsson, formaður meistaraflokksráðs Stjörnunnar, Þorvaldi fyrir vel unnin störf og segist hlakka til að vinna áfram með honum.

„Það er ljóst að sumarið var okkur erfitt fyrir margra hluta sakir sem verða ekki raktar hér en í öllum samskiptum höfum við unnið náið og vel með Þorvaldi og hefur samstarfið gengið vel og verið ánægja með þá hluti sem hafa verið ræktaðir þessa mánuði sem hann hefur stýrt liðinu og því er ánægjulegt að vita til þess að hann mun halda áfram störfum fyrir félagið og vinna að þeirri stefnu sem við höfum mótað okkur til framtíðar.“

Pepsi Max deild karla er á Stöð 2 Sport en upplýsingar um útsendingar má finna hér. Pepsi Max deildin er hluti af Stöð 2 Sport Ísland sem kostar 3.990 krónur á mánuði.