Umsvifamesti miðlari grófs barnaníðsefnis dæmdur í 27 ára fangelsi

Marques, sem er með tvöfalt ríkisfang, bæði á Írlandi og í Bandaríkjunum, var handtekinn á Írlandi árið 2013 og framseldur til Bandaríkjanna árið 2019. 

Hann rak vefþjóna á djúpvefnum þar sem notendur gátu nálgast afar gróft barnaníðsefni, meðal annars myndir og myndskeið af nauðgun og pyntingum ungbarna.

Yfirvöld sögðu mikið af efninu vera að koma fyrir augu þeirra í fyrsta sinn, sem þýðir að það hafði ekki verið flaggað og sett í gagnabanka sem notaðir eru til að bera kennsl á barnaníðsefni á netinu.

Þegar hann kvað upp dóminn líkti dómarinn Theodore Chuang Marques við fíkniefnabarón og sagði glæpi hans „viðurstyggilega“. Marques bað fórnarlömb ofbeldisins fyrirgefningar og biðlaði um annað tækifæri.

Saksóknarinn í málinu sagði Marques hafa skapað samfélag á netinu þar sem barnaníðingar gátu misþyrmt börnum og deilt hryllingnum með öðrum níðingum. „Þeir hópuðu sig saman og misnotuðu börn kynferðislega,“ sagði Ralph Paradiso. „Og þeir höfðu ánægju af misnotkuninni.“