Lands­liðs­þjálfarinn eftir súrt tap: „Þó við séum að þróa liðið viljum við alltaf vinna“

„Held við höfum fengið bestu færin í leiknum. Það er erfitt að fá sig mark svona snemma eftir hálfleik, við vorum sjálfum okkur verstir þar. Erum einfaldlega ekki klárir. Á þessu getustigi máttu ekki gefa andstæðingunum neitt. Var erfitt í síðari hálfleik þó við höfum fengið færi og mögulega átt skilið að jafna,“ sagði Arnar Þór um síðari hálfleikinn en hann var vart mínútu gamall er Ísland lenti undir.

„Heilt yfir er ég stoltur af strákunum. Ágætis frammistaða og þó það sé sem hægt er að laga þá er fullt sem ég er ánægður með. Á þessu getustigi þarf aðeins meiri gæði, það var akkúrat það sem vantaði upp á í dag. Sendingar fóru ekki á réttan stað, það eru gæði og svo ákveðin reynsla.“

„Þegar þú ert kominn á þetta getustig þarf allt að gerast aðeins hraðar. Allar sendingar þurfa að koma aðeins hraðar, það þarf að skila sér í vörn og sókn aðeins hraðar. Þetta eru allt skref sem við þurfum að taka.“

„Ég er rosalega stoltur af ungu drengjunum í liðinu. Þeir eldri voru líka frábærir alla vikuna. Við förum upp á hótel núna og greinum þetta. Tölum svo saman á morgun, snúum svo bökum saman og tökum næsta skref til að ná í stigin þrjú á sunnudaginn.“

Um stöðuna í riðlinum

„Hún er mjög erfið. Við erum í raun búnir að tapa öllum þeim stigum sem við megum tapa. Riðillinn þarf að spilast ansi skringilega til að við eigum möguleika, þurfum að vinna allt sem eftir er. Við vissum samt alveg í hvaða stöðu við vorum fyrir leikinn.“

„Ég sagði það fyrr í vikunni að staðan núna er allt önnur en hún var þegar við byrjuðum á þessu verkefni í mars. Það er ekki hægt að horfa framhjá því. Þá er bara að sjá möguleika í þeirri stöðu og horfa til framtíðar, þróa leikmenn og gefa leikmönnum áfram möguleika á sem bestum úrslitum með íslenska landsliðinu. Þó við séum að þróa liðið viljum við alltaf vinna. Getum ekki verið uppeldisstöð.“

„Þurfum að taka næsta skref allir saman. Það er heljarinnar verk framundan og við erum allir tilbúnir í það. Það eru allir klárir að gera sitt besta.“

Um undirbúninginn fyrir leik kvöldsins

„Frá og með deginum í gær fannst mér hann ganga mjög vel. Hef voðalega lítið þurft að kveikja í stráunum, þeir hafa verið mjög einbeittir á leikinn. Held það hafi sést í kvöld. Ef einbeitingin er samt ekki til staðar allar sekúndurnar af mínútunum 90 þá getur þú fengið mörk á þig, þurfum að vinna í því.“

Um fyrra markið

„Ég er hundfúll að hafa fengið það mark á mig, ef þú ferð inn í klefa sérðu að leikmennirnir eru það líka. Þú getur ekki gefið andstæðinginum svona mikið af mistökum í röð á þessu getustigi. Það er ekki kveikt á okkur þegar þeir taka innkastið fljóttm við sjáum ekki mann og bolta þegar fyrirgjöfin kemur. Þetta er dýrkeypt röð af mistökum. Við viljum ekki gefa andstæðingum okkar neitt, það eru grunngildi íslenska landsliðins. Við veðrum að vinna einvígin okkar og verður að vera kveikt á okkur allar sekúndurnar í leiknum,“ sagði Arnar Þór Viðarsson, þjálfari íslenska landsliðsins, að lokum.