Fækkar hægt í hópi ísraelsku ferða­mannanna sem eru mis­hressir

Ísraelsku ferðamennirnir, sem eru komnir á efri ár, eru sumir hverjir komnir til síns heima. Fimm voru fluttir til Ísraels á þriðjudag og fjórir fóru úr landi í gær. Þeirra á meðal kona sem lögð hafði verið inn á gjörgæslu að sögn Sigurjóns Hendrikssonar, varðstjóra hjá slökkviliðinu á höfuðborgarsvæðinu.

Gylfi Þór Þorsteinsson, umsjónarmaður farsóttarhúsa Rauða krossins, segir enn hátt í þrjátíu ísraelska ferðamenn með Covid-19 á farsóttarhúsinu. Allur gangur sé á því hvernig fólkið hafi það.

Uppiskroppa með lyfin sín

„Þetta er allt mjög fullorðið fólk og þau hafa verið mishress,“ segir Gylfi og vísar til annarra mála sem þurfi að sinna. Fólk verði uppiskroppa með lyf og ýmislegt annað sísl sem fylgi háum aldri.

Hann segir ísraelska sendiráðið vinna í því að koma fólkinu til síns heima en þekki ekki hvernig þau mál standi. Sendiráðið er ekki staðsett á Íslandi heldur í Noregi sem væntanlega flýtir ekki fyrir lausn í málinu.

Almennt sé staðan þó þannig í faróttarhúsinu að það fjölgi á hverjum degi.

„Það er ekkert skrýtið á meðan það eru hundrað plús smit í samfélaginu á hverjum degi,“ segir Gylfi. 218 gestir dvelja í húsnæði Rauða krossins sem er annars vegar tvö hús í Þórunnartúni og hins vegar tvö á Rauðarárstíg.

Jaðarhópar áfram í sóttkví

Af gestunum 218 eru 176 í einangrun. Stór hluti afgangsins eru fangar af Vernd en starfsemi þar lamaðist eftir að smit kom upp í húsakynnum Verndar. 

Þá segir Gylfi jaðarhópa á borð við heimilislausa og hælisleitendur í sóttkví í húsnæðinu enda eigi fólkið ekki í önnur hús að vernda.

Margt hafi breyst í ágúst þegar ákveðið var að hætta að taka við ferðamönnum sem vildu taka út sóttkví í farsóttarhúsi. Við það hafi losnað um mikið pláss en farsóttarhúsin voru yfirfull í júlí og komust færri að en vildu.

Nýtt hús á Akureyri

„Ég á alltaf pláss fyrir einangrun, fyrir þá sem þurfa hana nauðsynlega. Auðvitað er best ef fólk getur verið heima hjá sér en eftir að við losnuðum við ferðamennina þá opnaðist mikið rými fyrir okkur sem við erum að nýta.“

Til stendur að opna farsóttarhús á Akureyri á næstu dögum. Þar verður pláss fyrir átta í einangrun.

„Það er gert í ljósi þess að bæði varð smit í Grímsey sem gott er að fylgjast með. Þaðan er langt í læknisþjónustu. Eins hefur veiran verið að láta kræla á sér í Eyjafirðinum,“ bætir Gylfi við.