Fjöldi Íslendinga hefur notið sólarinnar á Tenerife undanfarnar vikur. Þar liggur næturlífið niðri á næturnar og takmarkanir eru á því hve margir geta setið saman á veitingastöðum. En annars leikur lífið við fólk á ströndinni, í sundlaugunum og skemmtigörðum.
Manúela, sem er með 55 þúsund fylgjendur á Instagram, hefur notað tímann í sólinni til að svara spurningum fylgjenda sinna. Manúela segist þau hafa farið í Covid-próf áður en þau fóru utan en aðeins þurft að sýna það á hótelinu þar sem þau gista.
Þá frumsýndi Manúela nýtt bikiní og upplýsti að elskhuginn hefði keypt settið á sig í vefverslun. Hann gæfi þó ekki upp hvar. Þá kemur fram að Eiður er konungur pabbabrandaranna.
Margan hefur dreymt um að leigja sér snekkju á suðrænum slóðum og létu Eiður og Manúela þann draum rætast í morgun. Eftir nokkrar mínútur af siglingu upplýsir Eiður að Manúela hafi spurt áhugasöm hvort þau gætu ekki bara leigt bátinn allan daginn.
Sú löngun átti eftir að breytast snögglega því Manúela greinir frá því að langstærstan hluta siglingarinnar hafi hún því miður verið sjóveik.
„Líf á sjónum er ekki fyrir mig kæru vinir,“ segir Manúela og eflaust tengir margur Íslendingurinn við það. Hvort sem er siglingu í heitu loftslagi eða í borð um Baldri, Herjólfi, á leið á Hornstrandir, út í Grímsey eða lengri siglingu með Norrænu.
Svo ekki sé talað um margan sjómanninn sem heldur til veiða þrátt fyrir að losna aldrei við bölvaða sjóveikina.
