Höfuð­verkurinn varðandi ís­lenska markið: Fyrri hluti

Eftir 76 A-landsleiki, tvö stórmót og minningar sem munu lifa að eilífu virðist þó sem hinn 37 ára gamli Hannes Þór gæti verið að missa sætið sitt sem aðalmarkvörður íslenska landsliðsins. 

Hannes Þór var ekki í landsliðshópnum sem mætti Mexíkó, Færeyjum og Póllandi og gaf það til kynna að Arnar Þór Viðarsson, landsliðsþjálfari, ætlaði í aðra átt er kemur að markvörðum íslenska landsliðsins.

Þeir Rúnar Alex Rúnarsson og Ögmundur Kristinsson stóðu sig með prýði í leikjunum þremur sem Ísland lék nýverið. Þá er að koma upp mjög áhugaverð kynslóð af ungum og efnilegum markvörðum hér á landi.

Rúnar Alex er 26 ára gamall og hefur spilað 10 A-landsleiki. Arnar Þór gaf honum tækifæri í markinu gegn Liechtenstein í undankeppni HM í vor. Þar átti Rúnar Alex fínan leik, það er þangað til hann fékk á sig mark beint úr hornspyrnu á 79. mínútu.

Hann stóð sig hins vegar með prýði gegn Mexíkó sem og hálfleikinn sem hann spilaði gegn Póllandi. Sömu sögu er að segja um hinn 31 árs gamla Ögmund sem hélt hreinu gegn Færeyjum og spilaði mjög vel gegn Póllandi þrátt fyrir að meiðast snemma í síðari hálfleik.

Ögmundur hefur spilað 19 A-landsleiki og er talsvert nær hinum hefðbundna A-landsliðsmarkverði í aldri en meðalaldur markvarða á EM í ár er til að mynda 31 árs.

Ögmundur er einnig töluvert „íslenskari“ ef svo má að orði komast en Rúnar Alex. Sá síðarnefndi er frábær í fótunum og gefur íslenska liðinu nýja vídd hvað það varðar. Ögmundur er hins vegar 1.93 metrar á hæð og talsvert stærri skrokkur en Rúnar sem er „aðeins“ 1.86 metrar á hæð.

Þeirra helsta vandamál er skortur á leikjum með félagsliði. Rúnar Alex er á mála hjá enska liðinu Arsenal og spilaði aðeins sex leiki á þessari leiktíð. Ögmundur er í sömu stöðu hjá gríska stórliðinu Olympiacos. Hann spilaði aðeins þrjá leiki á nýfastaðinni leiktíð.

Ef annar þeirra kemur sér til liðs þar sem hann fær að spila í hverri viku er næsta augljóst að Arnar Þór hefur fundið manninn sem mun standa á milli stanganna í íslenska markinu næstu misserin.

Hvað varðar kynslóðina á eftir þeim tveimur þá er Ísland ekki á flæðiskeri statt. Patrik Sigurður Gunnarsson átti frábært tímabil með Viborg og Silkeborg í dönsku B-deildinni þar sem hann tapaði varla leik og fékk varla á sig mark.

Þó Patrik Sigurður hafi spilað í dönsku B-deildinni síðasta vetur er hann samningsbundinn Brentford sem mun spila í ensku úrvalsdeildinni á næstu leiktíð. Hann er aðeins tvítugur að aldri og á að baki 12 leiki með U-21 árs landsliði Íslands. Hann var til tals á Vísi fyrir átök U-21 árs landsliðins á lokakeppni EM fyrr á þessu ári.

Elías Rafn Ólafsson er svo 21 árs markvörður sem spilaði með Fredericia í dönsku B-deildinni á síðustu leiktíð en er samningsbundinn danska úrvalsdeildarliðinu Midtjylland. Elías Rafn er 2.01 metrar á hæð og mjög frambærilegur markvörður.

Aðrir sem gætu bankað á dyrnar

Ef það er ekki nóg þá eru Jökull Andrésson og Hákon Rafn Valdimarsson líklegir til að banka á dyrnar hjá A-landsliðinu á næstu árum. Það er því ljóst að ef þessir ungu menn halda rétt á spilunum þá verður íslenska karlalandsliðið í frábærum málum er kemur að stöðu markvarðar næsta áratuginn eða svo.

Taka skal fram að pistillinn hér að ofan er aðeins skoðun blaðamanns en ekki íþróttadeildar Vísis í heild. 

Síðari hluti pistilsins birtist síðar í dag, þar verður farið yfir stöðuna hjá A-landsliði kvenna, það gæti einnig verið á leið í svipaðar breytingar.