Sjónar­spilið verður sí­fellt minna

Það hefur farið fram hjá fáum að dregið hefur veru­lega úr kviku­stróka­virkni gossins síðustu daga. Það hefur þó ekki dregið úr hraun­rennsli frá gígnum heldur hafa myndast ein­angraðar rásir undir hrauninu sem veita kvikunni far­veg.

Þor­valdur Þórðar­son ræddi gosið í Reykja­vík síð­degis í dag. Spurður hvort sjónar­spilið við gos­stöðvarnar ætti eftir að verða minna sagði hann:

„Það dregur heldur úr því held ég.“

Hraunið rennur allt undir skorpunni

Hann út­skýrði hvernig rennandi hraunið hefur búið sér til af­markaða far­vegi undir hörðu yfir­borðinu, sem það á greiða leið um. Megnið af hrauninu losni þannig frá gígnum án þess að það sjáist þegar horft er á gos­stöðvarnar.

„Þetta sem við sjáum á yfir­borðinu er bara skorpa, efst er hún stökk og síðan er hún deig undir. Deigi hlutinn hann heldur yfir­borðinu alveg uppi og þar undir er meira og minna rennandi hraun sem að er í á­kveðnum innri rásum,“ sagði Þor­valdur.

Og þetta þýðir að hraunið dreifir meira úr sér: „Hita­tapið minnkar og því heitari og meira þunn­fljótandi verður kvikan þegar hún kemur út úr flutnings­kerfinu. Þá á hún auð­veldara með að dreifa sér og lengja hraunið sem vex þá bara smátt og smátt.“

Hér má sjá magnaðar myndir frá gosstöðvunum í gær sem Vilhelm Gunnarsson, ljósmyndari Vísis, tók með dróna:

Hefur langt gos á tilfinningunni

Spurður hvort hraunið eigi þá eftir að renna yfir Suður­strandar­veg segir hann: „Það fer alveg eftir því hvað gosið stendur lengi. Ef að eins og mig grunar að þetta gos muni halda á­fram í ekki bara mánuði heldur ein­hver ár, þá er það auð­vitað ó­um­flýjan­legt að það fari niður að Suður­strandar­vegi.“

Það muni þó ekki gerast alveg á næstunni heldur mun taka tölu­verðan tíma fyrir hraunið að ná niður að veginum.

Finnst þér lík­legt að gosið verði í nokkur ár?

„Ég hef það svona á til­finningunni þó maður geti auð­vitað ekkert sagt um það því að náttúran hefur sína henti­semi á hlutunum. En það er ekkert sem segir okkur að gosið sé að stöðvast. Fram­leiðnin er enn þá sú sama,

Og eins og ég segi að flutnings­kerfið í hrauninu er að ein­angra sig betur og gígurinn er að ein­angra sig betur þannig að það er allt saman eitt­hvað sem stuðlar að því að gera þetta að þannig gosi að það geti búið til til­tölu­lega langt hraun og það ætti þá auð­velt með að fara alla leið niður í sjó.“