Litagleði hjá Sif Benedictu og Drífu Líftóru

Sif Benedicta er íslenskt fylgihlutamerki sem var stofnað árið 2016 af Halldóru Sif Guðlaugsdóttur fatahönnuði með það í huga að framleiða tímalausar, fallegar, endinga góðar tísku- og hönnunarvörur. 

Áherslur Sif Benedicta eru á hönnun fylgihluta eins og töskur, slæður, eyrnalokka og hárskraut sem standast tímans tönn í tilliti bæði til útlits og endingu. Halldóra leggur mikla áherslu á form og hefur hún næmt auga fyrir smáatriðum. Litasamsetningarnar eru oft óvæntar en útkoman virkilega áhugaverð. 

Þriðja lína Sif Benedicta var unnin í samstarfi með Brynju Skjaldar búningahönnuði og stílista. Það var sól og sumar á tískusýningu þeirra í safni Einars Jónssonar á HönnunarMars. Ljósir litir, sumarleg munstur og sundfatnaður í bland við flotta fylgihluti. 

Flíkurnar fullkomna lúkkið hjá Sif Benedictu og ýta hönnuninni  í nýjar áttir. Halldóra og Brynja vildu finna jafnvægi á milli litagleði og fortíðarþrá og hinnar hefðbundnu klæðskeralistar og fáguninni sem henni fylgir. Í línunni er unnið með andstæður frá 70‘s rómantíska áratugnum og stífleikanum sem oft fylgir góðum hefðbundnum klæðskurði á flíkum.

Eftir tískusýninguna um helgina færðu gestir sig út í garð í sólina og gengu fyrirsæturnar þar á milli fólks svo hægt var að skoða flíkurnar enn betur. 

„Við vildum finna jafnvægi á milli litagleði og fortíðarþrá og hinnar hefðbundnu klæðskeralistar og fáguninni sem henni fylgir,“ segir Halldóra um línuna.

Halldóra Sif Guðlaugsdóttir stundaði klæðskeranám í Danmörku og lærði seinna fatahönnun í LHÍ. Hluta af náminu sínu í LHÍ var hún lærlingur hjá Olympia-Le-tan. Eftir nám starfaði Halldóra Sif hjá Alexander McQueen í London. Þegar hún snéri aftur til Íslands eftir störf sín þar, stofnaði hún Sif Benedicta með eiginmanni sínum Kristni Péturssyni.

Það sem leynist bak við skugga 4. víddar

Á sýningunni er einnig sýnd hönnun Drífu Líftóru og héldu þær sameiginlega tískusýningu.  Hennar verkefni nefnist Það sem leynist bak við skugga 4. víddar sem er einstaklega falleg handþrykkt fatalína. Mynstrin ganga hvert upp í annað sem gefur af sér mjög lifandi fatalínu þar sem þú getur ráðið hvort þú viljir leiðast á slóðir bráðnandi blóma, drungalegra drauga eða válegra völundarhúsa?

Fatalínan er sprottin upp úr pælingum höfundar um myrkfælni sem völundarhús hugans og bjögunina sem á sér stað í skuggaspili. Sú hugmynd gaf af sér tvo mynstur flokka þar sem öll mynstur innan hvers flokks geta bæði staðið sér og gengið upp í hvort annað. Þannig er hægt að skeyta mismunandi mynstrum saman á ótal vegu. Efnin eru öll handþrykkt af Drífu sjálfri sem verður á staðnum til að hjálpa hverjum þeim sem vill að færa fleiri mynstur inn í sitt líf.

Drífa Líftóra útskrifaðist með BA próf í fatahönnun frá Listaháskóla Íslands vorið 2014. Eftir stutta viðkomu í London þar sem hún vann sem starfsnemi fyrir fyrirtækið KTZ hélt Drífa til Parísar í meistaranám. 

Hún útskrifaðist með MA gráðu frá Paris College of Art vorið 2017. Haustið 2018 hóf hún nám við textíldeild Myndlistaskólans í Reykjavík og útskrifaðist þaðan með diplómu vorið 2020. Drífa Líftóra hlaut styrk frá hönnunarsjóði til að láta fatalínuna Það sem leynist bak við skugga 4. víddar verða að veruleika.

Sýning hönnuðanna beggja fer fram á Listasafni Einars Jónssonar sem skapaði fullkomna stemningu fyrir þessar nýju línur. Sýningin er opin frá 12 til 17 í dag.

Uppfært: Í fyrri útgáfu greinar vantaði nafn Drífu Líftóru og biðjumst við velvirðingar á því.