Ráðleggur fólki frá því að vera efst í Nátthaga

Hörn Hrafnsdóttir, umhverfis- og byggingaverkfræðingur hjá Verkís, er stödd á gossvæðinu þar sem unnið er því að meta aðstæður.

„Aðstæður eru þannig núna að hérna vestanmegin þar er stopp í bili og hraun komið hátt upp á þennan varnarruðning sem var reistur í gær. Austanmegin hefur farið að flæða yfir og það streymir enn af fullum krafti yfir garðinn þannig að hann hefur ekki brostið heldur flæðir yfir hann, sagði Hörn Hrafnsdóttir, umhverfis- og byggingaverkfræðingur hjá Verkís.

„Þannig það er núna að streyma niður í þessar smáskálar bakvið stífluna og það rennur áfram þar til þær eru orðnar fullar, þá myndi hraunið byrja að streyma niður brekkuna og niður í Nátthaga. Þannig ég myndi ekki ráðleggja fólki að vera ekki þarna efst í Nátthaga næst brekkunni.“ 

Stíflugerð í Nátthaga kemur til greina

Hún segir erfitt að segja til um hvenær hraunið renni niður í Nátthaga.

„Ég skaust þarna yfir áðan og þá var töluvert streymi en það er líka töluvert rými áður en það fer að fæða alla leiðina niður.“

Það átti að varna því að hraunið fari niður í Nátthaga. Er hægt að gera eitthvað í Nátthaga til að verjast þvi að hraun fari niður á Suðurstrandarveg?

„Það væri mögulega hægt að skoða stíflugerð neðarlega í Nátthaga og það er heilmikið rými í Nátthaganum sjálfum en það á eftir að fara yfir þá stöðu og meta hvort menn vilji ráðast í það eða hvað, en það væri eitthvað sem hægt væri að skoða,“ sagði Hörn.

Vikur þar til hraun gæti flætt yfir Suðurstrandarveg

Miðað við núverandi stöðu, mun það taka vikur eða mánuði þar til hraun gæti náð yfir Suðurstrandarveg?

„Mér finnst líklegt að það séu einhverjar vikur. Þegar hraunið rennur þarna niður þá tekur kólnun við. Það er töluverð vegalengd og eldfjallafræðingar hafa sagt að hraunið renni ekki langt þegar það verður fyrir mikilli kólnun þannig að fyrst tekur örugglega við tími þar sem þetta rennur niður í Nátthaga, kólnar þar og byrjar að staflast upp. Svo verður kannski spurning um nýtt jafnvægi þar sem hraunið myndar einhverskonar hraunpolla sem það getur hoppað á milli til þess að komast áfram þannig það er erfitt að spá fyrir um þetta,“ sagði Hörn.

Jarð­eðlis­fræðingurinn Páll Einars­son gagn­rýndi fram­kvæmdirnar í kvöld­fréttum Stöðvar 2 á þriðju­dag eftir að ríkis­stjórnin sam­þykkti að verja tuttugu milljónum í þær. Hann sagði þetta sóun og að engin leið væri að stöðva hraunið með varnar­görðum. Aðspurð segir Hörn að mikilvægar upplýsingar hafi fengist með þessu verkefni.

„Já mér finnst við hafa fengið fínar upplýsingar út úr þessu og við eigum eftir að fara yfir þær.“

Mikilvægur upplýsingabanki fari að gjósa annars staðar

Hún segir að þessi reynsla muni nýtast fari að gjósa annars staðar á svæðinu.

„Við erum að hugsa þetta til lengri tíma. Við erum að horfa á Reykjanesið í heild og reyna að læra á það sem gæti verið fram undan næstu áratugina eða árhundruði miðað við það sem okkar fræðimenn segja. Og búa til upplýsingabanka sem gæti nýst okkur.“