Skorar á Al­vogen að birta öll gögn: Segir Björg­ólf um­svifa­laust hafa rekið Róbert fyrir ó­sæmi­lega hegðun

Þetta kemur fram í yfirlýsingu sem Halldór sendir á fjölmiðla.

Fréttablaðið greindi frá því í morgun að Halldór hefði átt fund með Björgólfi Thor Björgólfssyni athafnamanni í nóvember síðastliðnum og vitnaði í stefnu Alvogen á hendur Halldóri, þar sem segir meðal annars að umræddur fundur sé óásættanlegur.

Þá segir að samskiptastjóranum fyrrverandi hafi verið sagt upp vegna trúnaðarbrests.

Halldór segir hins vegar rangfærslur í stefnunni, sem hann muni gera grein fyrir þegar málið verður tekið fyrir. Hann segir umfjöllum um samskipti sín og Björgólfs ekki rétta og það sé hægt að staðfesta með upptökum af þeim fundum sem hann átti með „rannsóknarnefnd“ Alvogen.

„Ég var spurður um það sérstaklega hvort ég hafi hitt Björgólf Thor. Ég greindi frá því að ég hafi spurt hann um ósæmilega hegðun Róberts, þegar hann var forstjóri Actavis. Hann hafi staðfest við mig ákveðna atburðarrás í ágúst 2008, sem ég taldi mikilvægt að upplýsa um. Á þessum tíma hafi Róbert hringt í Sigurð Óla Ólafsson, aðstoðarforstjóra Actavis og gert tilraun til að segja honum upp störfum undir áhrifum áfengis. Ég staðfesti við nefndina að Björgólfur Thor hafi umsvifalaust rekið Róbert frá Actavis fyrir þessa ósæmilegu hegðun. Ég taldi þessar upplýsingar mikilvægar fyrir rannsókn málsins og sýni að ósæmileg hegðun Róberts nái yfir að minnsta kosti 12 ára tímabil. Björgólfur Thor virðist því vera eini maðurinn sem hafi sýnt kjark til að stöðva ósæmilega hegðun Róberts,“ segir í yfirlýsingu Halldórs.

Þar segir einnig að það sé ekki rétt að hann hafi neitað að mæta í þriðja sinn fyrir nefnd Alvogen, sem hafi jafnframt neitað honum um afrit af upptökum af fundunum og aðgang að vinnugögnum sínum.

Í yfirlýsingunni segist Halldór hafa sett sig í samband við „óvildarmenn“ Róberts, þeirra á meðal tvo háttsetta embættismenn og íslenskan blaðamann. Hann sakar Róbert um „andstyggilega aðför“ að æru þeirra og mannorði og segir ekki óeðlilegt að hann hafi haft samband við þá til að bera undir þá ásakanir.

Halldór segir ekki rétt að hann hafi gert fjárhagslega kröfu á Alvogen eða Alvotech en hann áskilji sér rétt til að sækja bætur til Róberts persónulega. Hann hafi þó ekki gert ákveðna kröfu hvað það varðar.

„Tilgangur fundarins með Björgólfi Thor var ekki að knýja fram fjárhagslegt uppgjör og það kemur ekki fram í þeim gögnum, sem fyrirtækin hafa lagt fram í héraðsdómi. Ég ítreka áskorun mína um að fyrirtækin einfaldlega opinberi öll gögn úr yfirheyrslum lögmannstofunnar White & Case,“ segir Hallór um fréttir morgunsins.

Hann sakar Fréttablaðið umað gera mikið úr því að hann hafi leitað til erlendrar lögmannsstofu en segir sig hafa ráðið einn íslenskan lögmann sem leitaði eftir stuðningi erlendis. Sex lögmannsstofur hafi hins vegar haft samband við sig eftir áramót eða unnið að málinu fyrir hönd Alvogen, Alvotech og Róberts.