Inga Sæland fékk að vita hverjir eru í sviðsljósinu hjá RÚV

„Ég er ekki í neinum vinsældaleiðangri. En ég var einmitt að hugsa þetta í morgun. Ég er svona landsbyggðartútta. Er mikið að ræða atvinnumál og tel mig á tánum þar, atvinnu og heilbrigðismál, innviðamál. Og hef staðið mig, þó ég segi sjálfur frá, bærilega í því. En það virðist ekki ná athygli. Ég er lítið beðinn um að tjá mig um þessa hluti, segir Sigurður Páll í samtali við Vísi.

Inga Sæland, formaður Flokks fólksins, hefur nú fengið svör við fyrirspurn sem hún lagði fram á dögunum og beindi til mennta og menningarmálaráðherra: 

Hvaða stjórnmálamenn hafa komið fram sem viðmælendur í útvarps- og sjónvarpsþáttum Ríkisútvarpsins á ári hverju frá upphafi árs 2018, hvaða stjórnmálaflokkum tilheyra þeir, í hvaða þáttum hafa þeir verið, hve lengi og hversu oft?

Ráðherrarnir tróna efstir á blaði

Það kemur á daginn að langsamlega vinsælasti stjórnmálamaðurinn, sá sem RÚVarar vilja helst tala við, er Katrín Jakobsdóttir forsætisráðherra sem skorar 966 stig. 

Í öðru sæti, og talsvert neðar, er Bjarni Benediktsson fjármálaráðherra með 564 stig. 

Þar á eftir koma svo ráðherrarnir Svandís Svavarsdóttir, Sigurður Ingi Jóhannsson og Lilja Dögg Alfreðsdóttir. 

Líklega er ekki úr vegi að fjölmiðlar vilji leita svara hjá valdhöfum hverju sinni.

Og ekki endilega víst að eftirsóknarvert megi heita að vera í fréttum, ef eitthvað er til í því að engar fréttir séu góðar fréttir. En á móti kemur að stjórnmálamenn þrífast á sviðsljósinu og ekki er langt í kosningarnar í haust. Þá er eins gott að kjósendur muni eftir þeim einstaklingum sem í framboði eru. 

Í því ljósi og út frá ýmsum vinklum öðrum er gaman að skoða hverjir eru oftast í sviðsljósinu þegar Ríkisútvarpið er annars vegar. Til að mynda verður ekki séð, í fljótu bragði, að konur séu út undan þegar kastljós Ríkisútvarpsins er annars vegar. 

Og þá er vert að hafa bak við eyrað að fjölmargir þættir geta haft áhrif, til dæmis einfaldlega sá að miserfitt getur reynst fyrir fjölmiðlamenn að ná í fólk.

Vinsælustu viðmælendurnir

1. Katrín Jakobsdóttir Vg - 966
2. Bjarni Benediktsson Sjálfstæðisflokki - 564
3. Svandís Svavardóttir Vg - 397
4. Sigurður Ingi Jóhannsson Framsóknarflokki - 344
5. Lilja D. Alfreðsdóttir Framsóknarflokki - 291
6. Kristján Þór Júlíusson Sjálfstæðisflokki - 240
7. Þór­dís Kol­brún R. Gylfa­dótt­ir Sjálfstæðisflokki - 237
8. Guðlaugur Þór Þórðarson Sjálfstæðisflokki - 235
9. Áslaug Arna Sigurbjörnsdóttir Sjálfstæðisflokki - 226
10. Sigríður Á. Andersen Sjálfstæðisflokki - 203
11. Logi Einarsson Samfylkingu - 201
12. Sigmundur Davíð Gunnlaugsson Miðflokki- 195

​Neðstir á lista

1. Sigurður Páll Jónsson Miðflokki - 8
2. Haraldur Benediktsson Sjálfstæðisflokki - 17
3. Njáll Trausti Friðbertsson Sjálfstæðisflokki - 17
4. Guðjón S. Brjánsson Samfylkingu - 17
5. Halla Signý Kristjánsdóttir Framsóknarflokki - 18
6. Albertína Friðbjörg Elíasdóttir Samfylkingu - 20
7. Líneik Anna Sævarsdóttir Framsóknarflokki - 20
8. Vilhjálmur Árnason Sjálfstæðisflokki - 21
9. Þórunn Egilsdóttir Framsóknarflokki - 23
10. Bergþór Ólafsson Miðflokki - 25
11. Bryndís Haraldsdóttir Sjálfstæðisflokki - 25
12. Jón Steindór Valdimarsson Viðreisn - 25
13. Þorbjörg Sigríður Gunnlaugsdóttir Viðreisn - 25

Sjálfur fyrirspyrjandinn, Inga Sæland, er með 101 stig. Svörin sem hún fékk byggjast á upplýsingum frá Ríkisútvarpinu og miðast skilgreining á hugtakinu stjórnmálamenn við þá 63 þingmenn sem nú sitja á Alþingi. Svarið hefur að geyma hversu oft hver og einn þingmaður kom fram í fréttum útvarps og sjónvarps á tímabilinu 1. janúar 2018 til 31. janúar 2021. Einnig kemur fram í hversu mörgum þáttum útvarps og sjónvarps viðkomandi birtist á sama tímabili ásamt framkomu í vefútsendingum.

Í svari er tekið fram að leitarniðurstaða úr gagnagrunni Ríkisútvarpsins sé háð því að nafn þátttakenda hafi verið skráð í kerfið.

Telur Miðflokkinn ekki fá næga athygli

Eins og áður sagði er Sigurður Páll í neðsta sætinu og hann spyr hvort það verði ekki alltaf einhver að taka að sér þessi neðstu sæti?

„Ég er nú ekkert vansvefta út af þessu. En ég vil meina það að ég sé að stunda vinnuna mína á þessum grundvelli. atvinnumála, grundvallarmála. Ég á aldrei í neinum útistöðum við fólk eða að finna að einhverju, hvernig fundir fara fram eða hver sagði hvað, eða hringdi í einhvern á aðfangadag.“

Sigurður Páll telur ekki úr vegi að þessar upplýsingar segi sína sögu en hvaða sögu liggur ekki alveg í augum uppi. 

„Við í mínum flokki erum ekki að fá mikla athygli hjá vissum fjölmiðli, það verður nú bara að segja það sem er og getur hver sem er dregið þá ályktun út frá því sem hann vill.“

Þar verður reyndar að undanskilja formann flokksins sem hefur ekki átt erfitt með það í gegnum tíðina að finna ljósið á sviðinu.

*Tímabilið 1. janúar 2021 til 31. janúar 2021.