Í tilkynningu frá Vegagerðinni eru vegfarendur varaðir við sprungunum og þeim bent á að aka varlega um svæðið.
Suðurstrandarvegur: Vegfarendur eru varaðir við sprungum sem myndast hafa í veginum vestan við Vigdísarvallaveg. Akið varlega. #færðin #skjálftar
— Vegagerðin | Iceland Roads (@Vegagerdin) February 27, 2021
Í samtali við Vísi segir G. Pétur Matthíasson að sprungurnar hafi komið í ljós í kjölfar jarðskjálftanna. Þær séu þó ekki svo stórar að tilefni sé til að loka veginum, en merkt verði fyrir þeim. Verið er að skoða hvernig best er að gera við veginn.
Mikil skjálftavirkni hefur verið á Reykjanesskaga á síðustu dögum. Upp úr klukkan átta í morgun varð til að mynda skjálfti, 5,2 að stærð, skammt frá Fagradalsfjalli. Á miðvikudag var þá skjálfti upp á 5,7 að stærð á svipuðum slóðum. Margir minni skjálftar hafa orðið á svæðinu síðan þá.
