Tekst að knýja fram breytingar á Pepsi Max deild karla?

Fylkir, Fram, ÍA og stjórn KSÍ sendu öll inn mismunandi tillögur um breytingar á deildinni, sem taka ættu gildi vorið 2022, sem hægt er að lesa um á vef KSÍ. 

Samkvæmt upplýsingum Vísis úr herbúðum Fylkis og ÍA munu félögin draga tillögur sínar til baka. Skagamenn styðja eftir því sem næst verður komist tillögu Fram en afstaða Fylkis liggur ekki fyrir.

Framarar verða með stjórnarfund annað kvöld, innan við sólarhring fyrir þing KSÍ, þar sem þeir taka ákvörðun um framhaldið. Falli þeir frá sinni hugmynd, um 14 liða efstu deild, gæti því tillaga stjórnar KSÍ staðið ein eftir.

Allir virðast sammála um þá hugmynd að fjölga leikjum í efstu deild karla, meðal annars með það að markmiði að auka tekjur félaganna. Hins vegar virðist alls kostar óvíst að um eina hugmynd náist nægilega mikil sátt en 2/3 hluta atkvæða þarf á þinginu til að tillaga um breytingar verði samþykkt.

Í stuttu máli snýst tillaga stjórnar KSÍ, sem byggir á vinnu starfshóps, um að hafa áfram 12 lið í deildinni en skipta henni í tvennt eftir hinar venjulegu 22 umferðir. Hvert lið fengi þá fimm aukaleiki því efstu sex liðin myndu mætast innbyrðis í úrslitakeppni og neðstu sex liðin sömuleiðis.

Tillagan þykir meðal annars henta þar sem að einfalt yrði að fara aftur í fyrra form ef hún reyndist ekki skila árangri, og sumir telja að hún geri deildina að enn söluvænlegri vöru, félögunum öllum til góða. Aðrir benda á að hún geti ýtt undir ójöfnuð og þjónað hagsmunum best stöddu félaganna best.

Níu félög í efstu deild styðja tillögu stjórnar KSÍ

Íslenskur toppfótbolti, hagsmunasamtök félaganna í efstu tveimur deildum karla og kvenna, sjá nú í fyrsta sinn um sölu sjónvarpsréttinda. Þeim er í mun að úr því fáist skorið á þinginu á laugardag hvaða vöru þau hafi í höndunum, og að hún sé sem söluvænlegust.

ÍTF fundaði fyrir nokkru síðan með félögunum í efstu tveimur deildum karla til að kanna hug manna varðandi breytingatillögurnar. Þar munu níu félög í efstu deild hafa lýst yfir áhuga á að styðja tillögu stjórnar KSÍ en þrjú ekki. Það var áður en að ÍA og Fylkir ákváðu að draga sínar tillögur til baka. 

Í næstefstu deild virtust 2-3 félög sátt við tillögu stjórnar KSÍ en önnur voru áhugasamari um tillögu Fram um 14 liða deild.

Afstaða félaganna í 2., 3. og 4. deild liggur ekki fyrir. Viðmælendum Vísis þykir þó ljóst að freistandi sé fyrir þau lið sem ekki tilheyra efstu deild að samþykkja tillögu um fjölgun liða, svo að auðveldara verði að vinna sér sæti í deild þeirra bestu.

Félögin með fleiri atkvæði eftir því sem þau eru ofar

Verði tillögur stjórnar KSÍ og Fram báðar lagðar fram er því útlit fyrir jafna kosningu og spurning hvort nokkur breyting verði, þar sem að 2/3 hluta atkvæða þarf til að tillaga sé samþykkt.

Hafa ber í huga að félögin í efstu deild hafa mest vægi í kosningunni. Hver þingfulltrúi hefur eitt atkvæði og eiga félög í efstu deildum karla og/eða kvenna á komandi leiktíð fjóra fulltrúa á þinginu. Félög í 1. deild karla og/eða kvenna eiga 3 fulltrúa. Félög í 2. deild karla eiga 2 fulltrúa. Önnur félög eiga 1 fulltrúa, að því gefnu að þau hafi leikið fimm leiktíðir samfleytt.