Fyrr­verandi lög­reglu­maður grunaður um skot­á­rásina á bíl borgar­stjóra

Þetta hefur fréttastofa eftir öruggum heimildum, en Fréttablaðið greindi fyrst frá.

Árið 2003 hlaut maðurinn sem um ræðir fangelsisdóm fyrir kynferðisbrot gegn þremur ungum stúlkum. Hann lauk afplánun árið 2005 en árið 2009 sótti hann um uppreist æru, sem hann fékk árið 2010.

Maðurinn var handtekinn síðastliðinn laugardag og úrskurðaður í gæsluvarðhald til mánudags. Gæsluvarðhald yfir honum var svo framlengt í gær og er í gildi til næsta föstudags. Var það framlengt á þeim forsendum að hann teldist hættulegur.

Í dag var greint frá því að málið væri rannsakað sem brot gegn valdstjórninni. Áður hafði verið greint frá því að ekki væri unnt að fella málið undir brot gegn æðstu stjórn ríkisins.

Einn annar maður hefur verið handtekinn í tengslum við málið en honum hefur síðan verið sleppt.