Sextugur karlmaður í gæsluvarðhald vegna skotárásarinnar

Tveir karlmenn hafa réttarstöðu sakbornings í málinu en annar þeirra hefur verið látinn laus. Talsvert magn af skotvopnum fannst á heimili hans. 

Í tilkynningu frá lögreglu segir að rannsókn málsins miði vel. Fréttastofa hefur ekki náð tali af lögreglu í dag. 

Tilkynninguna frá lögreglu má sjá hér fyrir neðan: 

Karlmaður um sextugt var í dag í Héraðsdómi Reykjavíkur úrskurðaður í gæsluvarðhald til 1. febrúar á grundvelli rannsóknarhagsmuna að kröfu Lögreglunnar á höfuðborgarsvæðinu í þágu rannsóknar hennar á skemmdum sem voru unnar á bifreið borgarstjóra og húsnæði Samfylkingarinnar á dögunum. Rannsókn málsins miðar vel, en annar karlmaður hefur einnig réttarstöðu sakbornings í málinu.

Í fyrri tilkynningu um málið í dag var ranglega sagt að maðurinn í haldi lögreglu, sem nú hefur verið úrskurðaður í gæsluvarðhald, væri á fimmtugsaldri og leiðréttist það hér með.

Ekki er hægt að veita frekari upplýsingar um málið að svo stöddu.