Tekst Conte loks að sigra Gömlu konuna sína?

Antonio Conte, knattspyrnustjóri Inter, hefur mikla og sterka tengingu við Juventus. Hann lék lengi með Juventus og tók svo við gamla liðinu sínu sumarið 2011. Juventus var þá búið að enda í 7. sæti tvö tímabil í röð og risið var ekki hátt á Tórínó-liðinu.

Conte kippti því snögglega í liðinn og Juventus varð ítalskur meistari 2012 án þess að tapa leik. Juventus vann tvo meistaratitla í viðbót undir stjórn Contes áður en hann hvarf á braut 2014.

Til að gera langa sögu stutta hefur Juventus ekki hætt að vinna síðan Conte kom liðinu aftur á toppinn. Nú er hlutverk hans hins vegar að fella Gömlu konuna sínu af stallinum.

Það tókst ekki á síðasta tímabili en núna er Inter fjórum stigum á undan Juventus þegar keppni í ítölsku úrvalsdeildinni er tæplega hálfnuð. Vandamálið fyrir Inter er að grannar þeirra í AC Milan hafa komið verulega á óvart og eru á toppi deildarinnar.

Á ýmsu hefur gengið hjá Juventus á fyrsta tímabil liðsins undir stjórn Andreas Pirlo, mannsins sem Conte fékk til Juventus á frjálsri sölu 2011 og átti stóran þátt í velgengni liðsins næstu árin.

Juventus hefur þó verið á góðri siglingu að undanförnu, unnið fjóra leiki í röð í deild og bikar og skorað þrjú mörk eða meira í þeim öllum. Juventus varð meðal annars fyrsta liðið til að vinna Milan í deildinni, 1-3 á San Siro.

Cristiano Ronaldo, sem verður 36 ára í næsta mánuði, hefur farið mikinn og er markahæstur í ítölsku úrvalsdeildinni með fimmtán mörk í aðeins þrettán leikjum.

Geta jafnað Milan að stigum

Milan á ekki að leika fyrr en á morgun og því getur Inter jafnað granna sína á toppi deildarinnar í kvöld. Conte þarf þá að gera nokkuð sem honum hefur ekki enn tekist á þjálfaraferlinum; vinna Juventus. Lið hans hafa fjórum sinnum mætt Juventus og tapað öllum leikjunum.

Juventus vann báða leikina gegn Inter á síðasta tímabili; 1-2 á San Siro og 2-0 á Allianz-vellinum í Tórínó. Paolo Dybala skoraði í báðum leikjunum en mark hans í seinni leiknum var sérstaklega glæsilegt.

Þá tapaði Conte einnig fyrir Juventus sem stjóri Atalanta og Arezzo. Juventus vann Arezzo í B-deildinni 2007 með fimm mörkum gegn einu. Gianluigi Buffon og Giorgio Chiellini spiluðu allan leikinn fyrir Juventus en þeir eru enn í herbúðum liðsins. Juventus vann svo Atalanta-strákana hans Contes 2009, 2-5.

Inter hefur aðeins fengið tvö stig í síðustu tveimur deildarleikjum sínum en vann dramatískan sigur á Fiorentina í sextán liða úrslitunum ítölsku bikarkeppninnar á miðvikudaginn, 1-2. Romelu Lukaku skoraði sigurmarkið mínútu fyrir lok framlengingar.

Leikur Inter og Juventus hefst klukkan 19:45 í kvöld og verður sýndur beint á Stöð 2 Sport 4.

Ítalski boltinn, Serie A, er á Stöð 2 Sport en upplýsingar um útsendingar má finna hér. Serie A er hluti af Stöð 2 Sport erlent sem kostar 3.990 krónur á mánuði en einnig má kaupa útsendingar sem stakan viðburð á 990 krónur.