„Það hefur náttúru­lega skapast glæ­nýr veru­leiki í kjöl­far heims­far­aldurs“

Skýið er skapandi skóli sem leggur áherslu á að kenna fjölbreytt námskeið á ferskan og hnitmiðaðan hátt. Boðið er upp á námskeið í hverjum mánuði fyrir fullorðna, börn og unglinga. Námskeiðin eru ýmist dagsnámskeið, helgarnámskeið eða mánaðarnámskeið fyrir fólk sem vill auka við þekkingu sína og sköpunarkraft og jafnframt búa sér til ný tækifæri. Allir kennarar eru fagfólk á sínu sviði og þekktir fyrir áhugaverða nálgun í kennslu og framsögu.

Þær hafa allar áralanga reynslu af því að kenna, koma fram og stýra verkefnum innan og utan landsteinanna. Mikið af þeim sérfögum sem eru í boði var áður fyrr einungis hægt að læra í háskóla sem hluta af sérhæfðu og löngu námi, og erfitt var að finna námskeið hér á landi fyrir þá sem höfðu áhuga á að kynnast slíku á stuttu námskeiði til gamans án þess að skuldbinda sig til lengri tíma.

„Það hefur náttúrulega skapast glænýr veruleiki í kjölfar heimsfaraldurs. Við stöndum frammi fyrir miklu atvinnuleysi og fólk að leita sér að nýjum verkefnum og áskorunum jafnvel á nýjum starfsvettvangi. Þetta er fullkominn tími til að demba sér í eitthvað nýtt áhugamál. Hversu geggjað væri að læra að gera flotta kokteila, læra að forrita og stofna síðan fyrirtæki í kringum allt batteríið,” segir Unnur Eggertsdóttir.

Vonandi virkar þetta sem vítamínsprauta

„Nú sem aldrei fyrr er fólk í leit að aukinni þekkingu á nýjum sviðum. Við vonum að Skýið muni virka sem vítamínsprauta inn á íslenskan atvinnumarkað og efli fólk til að næra áhugamálin sín. Það ættu flestir að finna eitthvað fyrir sig, sama á hvaða aldri þau eru,” segir Edda Konráðsdóttir.

Sem dæmi um námskeið sem boðið verður upp á í Skýinu er leiklist, lagasmíðar, forritun, kokteilagerð, pródúsering og markaðssetning. Þegar námskeiðum ljúka hafa nemendur aðgang að lokuðu tengslaneti þar sem aðrir nemendur skólans og kennarar geta deilt ráðum og hugmyndum.

„Við bjóðum einnig upp á námskeið og vinnusmiðjur fyrir fyrirtæki þar sem sett er saman sérsniðin dagskrá sem hentar hverju og einu fyrirtæki. Það hafa náttúrulega allir gott af því að láta hrista aðeins í hópnum,” segir Hildur.

Skýið er staðsett í Faxafeni 10, þar sem Menntaskólinn Hraðbraut var áður til húsa.

„Fyrst um sinn verða öll námskeiðin kennd í fjarkennslu gegnum Zoom vegna sóttvarnarregla en stefnt er að því að fyrstu námskeið í persónu fari af stað á næsta ári. Við hlökkum ekkert smá mikið til að geta tekið á móti fólki í húsnæðinu okkar og boðið upp á kaffi og notalega skólastofu,” segir Edda.

Einnig mun vera hægt að sækja einkatíma hjá kennurum skólans og bóka þá gegnum heimasíðuna. Skráning á námskeiðin er hafin og er hægt að skrá sig gegnum heimasíðu skólans.