Tveir létust af völdum Covid-19

Tveir létust af völdum Covid-19 síðastliðinn sólarhring. Alls hafa nú tuttugu látist af völdum Covid-19 hér á landi samkvæmt tölfræði á covid.is.

Þau sem létust voru á áttræðis og níræðisaldri.

Þórólfur Guðnason sóttvarnalæknir staðfestir í samtali við fréttastofu að tveir hafi látist. Ekki fengust frekari upplýsingar frá Landspítala.

Tíu létust í fyrstu bylgju faraldursins hér á landi og hafa nú tíu látist í þeirri sem nú gengur yfir.

Þrettán greindust með kórónuveiruna innanlands í gær samkvæmt uppfærðum tölum á covid.is. Alls hafa nú 5.078 manns greinst með kórónuveiruna hér á landi frá upphafi faraldursins í lok febrúar.