Innkalla barnapeysur vegna kyrkingarhættu

UNICEF á Íslandi hefur innkallað hettupeysur í barnastærð sem voru settar í sölu sem hluti af fjáröflun fyrir starfsemi samtakanna. Bönt í hettum eða hálsmáli á þessari tilteknu stærð af peysunni geta valdið hætti á kyrkingu.

Þetta kemur fram á vef Neytendastofu þar sem segir að af öryggisástæðum vilji samtökin benda þeim sem keypt hafa umræddar peysu að fjarlægja böndin úr peysunum eða skila peysunni til UNICEF á Íslandi.

Ástæða innköllunarinnar er sú að böndin í hettunum eru ekki í samræmi við lög um öryggi vöru og opinbera markaðsgæslu. Ekki er heimilt að hafa bönd eða reimar í hálsmáli fatnaðar ætlað börnum yngri en 7 ára, upp í 1,34 metra hæð. Í barnafatnaði fyrir börn 7- 14 ára mega bönd eða reimar í hálsmáli ekki standa lengra en 75 mm út úr flíkinni.

Neytendastofa hvetur þá sem keypt hafa ofangreindar flíkur að snúa sér til UNICEF á Íslandi eða fjarlægja böndin úr hettunum en innköllunin varðar aðeins þær peysur sem eru í barnastærð.

Í færslu á vef Unicef á Íslandi segir að hægt sé að skila barnapeysunum gegn fullri endurgreiðslu. Biðjast samtökin afsökunar á mistökunum hvað þetta varðar og segja þau að reimarnar verði fjarlægðar úr öllum ósendum pöntunum.