Hin látna var á níræðisaldri

Konan sem lést á Landspítalanum á síðastliðnum sólarhring var á níræðisaldri. Þetta segir Þórólfur Guðnason sóttvarnalæknir við fréttastofu Ríkisútvarpsins. Fram kom á Vísi fyrr í dag að um aldraða konu væri að ræða.

Um er að ræða ellefta andlátið af völdum Covid-19 hér á landi en það fyrsta í bylgjunni sem nú gengur yfir. Tíu létust í fyrstu bylgju faraldursins í vor.

Konan var ekki á gjörgæslu að sögn Más Kristjánssonar, yfirlæknis á smitsjúkdómaadeild Landspítalans.

„Aldrei hefur verið mikilvægara að við tökum öll höndum saman í þessu verkefni: Að ná stjórn á faraldrinum, ná smitunum niður og làgmarka þannig skaðann fyrir land og þjóð,“ sagði Katrín Jakobsdóttir forsætisráðherra í dag.